تاسقىننان كەيىن سالىنعان ۇيلەردىڭ ساپاسىنا نەشە جىل كەپىلدىك بەرىلەدى

استانا. KAZINFORM - ونەركاسىپ جانە قۇرىلىس ءمينيسترى قانات شارلاپايەۆ كوكتەمدەگى تاسقىن سالدارىنا بايلانىستى بوي كوتەرگەن 2,5 مىڭنان استام ءۇيدىڭ ساپاسىنا مەردىگەرلەر 2 جىل كەپىلدىك بەرىپ وتىرعانىن ايتتى.

«تاسقىننان كەيىن قايتا سالىنعان 2576 ءۇيدىڭ ساپاسىنا كىم جانە قانشا مەرزىمگە كەپىلدىك بەرەدى. 4-5 جىلدان كەيىن بۇل ۇيلەر قيراپ جاتسا، كىم جاۋاپ بەرەدى؟» - دەپ سۇرادى جۋرناليست ۇكىمەت وتىرىسىنان كەيىن وتكەن باسپا ءسوز ءماسليحاتىندا.

ءمينيستردىڭ ايتۋىنشا، ساپا كەپىلدىگىن سول ۇيلەردى سالعان مەردىگەرلەر بەرەدى.

«سالىنعان 2600 ءۇيدىڭ كوبى جەكە ءۇي ەكەنىن ءتۇسىنۋ كەرەك. ول ۇيلەرگە ءار مەردىگەر 2 جىل مەرزىمگە كەپىلدىك بەرەدى. وسى ەكى جىلدىڭ ىشىندە بىردەڭە بولسا، مەردىگەر جوندەپ بەرۋگە مىندەتتى بولادى»، - دەدى قانات شارلاپايەۆ.