تاسقىننان جاپا شەككەن حالىققا شوۋ-بيزنەس جۇلدىزدارى قانداي كومەك بەرىپ جاتىر
استانا. KAZINFORM - ەل باسىنا كۇن تۋعاندا حالىق جۇرت الدىندا جۇرگەن تانىمال تۇلعالاردى ىزدەي باستايدى. سولاردىڭ ءبىر اۋىز جىلى ءسوزى، كومەگى قينالعان جۇرتقا جىگەر بولارى ءسوزسىز.
الەۋمەتتىك جەلىدە «انشەيىندە حالقىم، ەلىم-جۇرتىم دەپ ەمىرەنىپ جۇرەتىن انشىلەر قايدا؟ حالقىنىڭ قاسىنان تابىلىپ، نەگە ەلدى كومەككە جۇمىلدىرمايدى؟» دەگەن سىني پىكىرلەر كوپ جازىلىپ جاتىر.
ارينە وسىنداي سىن ساعاتتا تانىمال تۇلعالار ەل الدىنا شىعىپ، ەلدى سابىرعا، اۋىزبىرشىلىككە شاقىرىپ، قايرىمدىلىق شارالار ۇيىمداستىرسا نۇر ۇستىنە نۇر بولار ەدى. ويتكەنى جۇلدىزداردىڭ، تانىمال تۇلعالاردىڭ ءسوزى ءوتىمدى بولاتىنى راس.
ەلدىڭ ەڭسەسىن ەزگەن سۋ اپاتىنا مۇمكىندىگىنشە اتسالىسىپ كومەك اتاپ جاتقان ونەر وكىلدەرى دە جوق ەمەس. بۇگىن ايتىسكەر اقىن اينۇر تۇرسىنبايەۆا سۋدان زارداپ شەككەن ءوڭىر تۇرعىندارىنا قارجىلاي كومەك اتادى.
بۇل تۋرالى ايتىسكەر الەۋمەتتىك جەلىدەگى پاراقشاسىندا جازدى.
— توپان سۋ باسىپ جاتقان ايماقتارداعى حالىقتىڭ جاعدايىنا الاڭداپ وتىرمىز. ءبىزدىڭ كۇشىمىز بىرلىكتە! بۇل قيىندىقتان دا امان وتەمىز. پرەزيدەنتىمىز بارلىق شىعىن وتەلەتىنىن ايتىپ جاتىر. ازاماتتار امان بولسا وسى جەرلەردە كەرەمەت قالاشىقتار بوي كوتەرىپ، ارتى توي بولاتىنىنا سەنەمىز. وتباسىمىزدىڭ اتىنان 5 ميلليون قارجى بەرىپ جاتىرمىز. اللا قالاسا بالالار كيىمدەرى، پامپەرس، تاعى باسقا كەرەك-جاراقتى الىپ ءار ايماققا تەڭدەي ءبولىپ تاراتامىز. ەلىمىزگە اللا جار بولسىن! - دەپ جازدى ول.
تانىمال ءانشى ءمادينا ءسادۋاقاسوۆا تاسقىن سۋدان زارداپ شەككەندەرگە 1 ميلليون تەڭگە قارجىلاي كومەك بەرىپ، ەلدى سابىرعا شاقىردى.
ول كومەگىن ءارى قاراي دا جالعاستىراتىنىن ايتتى.
- ەلىمىزدە بۇنداي تابيعي اپات بۇرىن-سوڭدى بولماعان. مۇنداي قيىن كەزەڭدەردە ءبىر- بىرىمىزگە قول ۇشىن بەرىپ، دەمەۋ بولايىق. سۋعا كەتكەن وڭىرلەردە قۇتقارۋ جۇمىسىن جۇرگىزىپ جاتقان ازاماتتارعا مىڭ العىس! گۋمانيتارلىق، قارجىلاي كومەك كورسەتىپ جاندارعا اللا رازى بولسىن. ءبىزدىڭ وتباسى دا ءوز ۇلەسىن قوسىپ، كاسپي بانك ارقىلى 1 ميلليون تەڭگە اۋداردىق! بۇل تەك باستاماسى، قولىمنان كەلگەنشە، الدە دە كومەك بەرۋدى توقتاتپايمىن، جالعاستىرامىن. اللام قازاقستاننىڭ ءار ءوڭىرىن تابيعي اپاتىنان ساقتاسىن، - دەپ جازدى ءانشى.
سونداي- اق جاقىندا الەۋمەتتىك جەلىدە، ءانشى تورەعالي تورەالى، نۇربولات ابدۋللين جانە باسقا دا شوۋ بيزنەس وكىلدەرىنىڭ سۋ اپاتىنان زارداپ شەككەن حالىققا قارجىلاي كومەك اتاپ جاتقان ۆيدەو تاراعان ەدى.
اۆتور
ريزابەك نۇسىپبەك ۇلى
