تاسقىن وتەماقىسىمەن بايلانىستى الاياقتىق سحەما پايدا بولدى
استانا. KAZINFORM - ىشكى ىستەر مينيسترلىگىنىڭ رەسمي وكىلى شىڭعىس الەكەشيەۆ تاسقىن وتەماقىسىمەن بايلانىستى الاياقتىق سحەما پايدا بولعانىن ءمالىم ەتتى.
«ىشكى ىستەر مينيسترلىگى ينتەرنەت-الاياقتاردىڭ جاڭا سحەمالارى پايدا بولعانىن ەسكەرتەدى. وتەماقى تولەۋدى كۇتكەن ادامدارعا الاياقتار بەلگىلى ءبىر مەملەكەتتىك ورگاننىڭ اتىنان قوڭىراۋ شالىپ، تاسقىننان زارداپ شەككەندەردىڭ تىزىمىندە تۇرعانىن راستاۋ ءۇشىن SMS-تەن كود جازىپ جىبەرۋىن ۇسىنۋى مۇمكىن.
شىندىعىندا، وسى كودتىڭ ارقاسىندا الاياقتار جابىرلەنۋشىنىڭ اتىنا كوپ مولشەردەگى نەسيە راسىمدەي الادى»، - دەدى ول ورتالىق كوممۋنيكاتسيالار قىزمەتىندە وتكەن بريفينگىدە.
سونداي-اق، ول مۇنداي سحەمالاردىڭ قۇربانى بولماۋ ءۇشىن نە ىستەۋ كەرەكتىگىن دە ايتتى.
«مىنانى ءبىلۋ ماڭىزدى، مەملەكەتتىك ورگاندار مەن بانكتەردىڭ قىزمەتكەرلەرى ەشقاشان تەلەفون ارقىلى قۇپيا دەرەكتەردى بەرۋدى تالاپ ەتپەيدى. زارداپ شەككەندەرگە وتەماقى تولەۋ ماسەلەلەرى تەك رەسمي تۇردە شەشىلەدى: جەكە بارىپ نەمەسە رەسمي ۆەب-رەسۋرستاردى پايدالانۋ ارقىلى عانا راسىمدەلەدى. Sms-كە كەلەتىن كودتاردى ەشكىمگە حابارلاۋعا بولمايدى. كۇماندى سىلتەمەلەرگە وتۋگە بولمايدى. تەلەفونىڭىزعا قاۋىپتى ۆيرۋستار ءوتىپ كەتسە، بۇل الاياقتارعا تەلەفون يەسىنىڭ اتىنان بانكت وپەراتسيالارىن جاساۋعا مۇمكىندىك بەرەدى»، - دەدى شىڭعىس الەكەشيەۆ.
