تاسقىن سۋ اتىراۋدىڭ سولتۇستىك بولىگىندەگى ەلدى مەكەندەرگە قاۋىپ ءتوندىرىپ تۇر
اتىراۋ. KAZINFORM - جايىق وزەنىندەگى تاسقىن سۋ اتىراۋ قالاسىنىڭ سولتۇستىك بولىگىندەگى ەلدى مەكەندەرگە قاۋىپ ءتوندىرىپ تۇر.
اتىراۋ وبلىسى توتەنشە جاعدايلار دەپارتامەنتى باستىعىنىڭ ورىنباسارى رۋسلان شارييەۆتىڭ ايتۋىنشا، تاسقىن سۋ المالى جانە بەسىكتى اۋىلدارىنا جاقىنداعان.
«جايىق وزەنىندە سۋ دەڭگەيىنىڭ كوتەرىلۋىنە بايلانىستى اتىراۋ قالاسىنىڭ ماڭىنداعى 1-5-ۋچاسكەلەر قاۋىپتى اۋماقتا قالىپ وتىر. سول سەبەپتەن، وزەن جاعالاۋىنداعى ەلدى مەكەندەردە تاۋلىك بويى كەزەكشىلىك جۇرگىزۋ قولعا الىندى. قازىر سۋ ايدىنىنىڭ جاعالاۋىنداعى قورعانىس بوگەتى شيفەرمەن قوسىمشا بەكىتىلىپ جاتىر. جاعاداعى دامبى بيىكتەتىلىپ، كانالدار تەرەڭدەتىلۋدە. اعىنى قاتتى تاسقىن سۋ اتىراۋ قالاسىنىڭ سولتۇستىك بولىگىندە ورنالاسقان بارلىق ەلدى مەكەنگە قاۋىپ ءتوندىرىپ تۇر»،- دەدى ءمالىم ەتتى رۋسلان شاريەۆ.
ونىڭ دەرەگىنە قاراعاندا، اتىراۋ مەن ونىڭ ماڭىنداعى قورعانىس بوگەتىن نىعايتۋ جۇمىسىنا توتەنشە جاعدايلار مينيسترىلىگىنىڭ، قورعانىس مينيسترلىگى جانە جەرگىلىكتى اتقارۋشى ورگانداردىڭ قىزمەتكەرلەرى مەن ەرىكتىلەر جۇمىلعان.
ەسكە سالا كەتەلىك، بۇعان دەيىن اتىراۋ پوليتسەيلەرى تۇرعىندارى ەۆاكۋاتسيالانعان تالدىكول اۋىلىن باقىلاۋعا العانىن جازعان بولاتىنبىز.
