تاسقىن كەزىندە ەۆاكۋاتسيالانعان 560 ادامنىڭ سوزىلمالى اۋرۋى بار – د س م
استانا. KAZINFORM - دەنساۋلىق ساقتاۋ مينيسترلىگىنىڭ رەسمي وكىلى ايگەرىم ورازاليەۆا ورتالىق كوممۋنيكاتسيالار قىزمەتىندە وتكەن بريفينگىدە تاسقىن كەزىندە ەۆاكۋاتسيالانعان 560 ادامنىڭ سوزىلمالى اۋرۋى بار ەكەنىن ءمالىم ەتتى.
«سۋ تاسقىنى ايماقتارىنان ەۆاكۋاتسيالانعان 560 ادامنىڭ ءارتۇرلى سوزىلمالى اۋرۋلارى بار. ولار سونداي-اق ورنالاسقان جەرى بويىنشا تولىعىمەن تەگىن ءدارى-دارمەكتەرمەن قامتاماسىز ەتىلگەن.
اتىراۋ، قۇلسارى قالالارىندا دەنساۋلىق ساقتاۋ سالاسىنداعى جاعداي تۇراقتى. سۋ تاسقىنىنا بايلانىستى ازاماتتار مەديتسينالىق كومەككە جۇگىنگەن جوق، مەديتسينالىق ۇيىمدار شتاتتىق رەجيمدە جۇمىس ىستەۋدە.
قوستاناي قالاسىندا سۋ تاسقىنىنان زارداپ شەككەندەر ءۇشىن 88 ەۆاكۋاتسيالىق پۋنكت اشىلدى. مەديتسينالىق كومەككە مۇقتاج ادامدار ءۇشىن قالا ستاتسيونارلارىندا قوسىمشا 195 توسەك-ورىن ورنالاستىرىلدى.
باتىس قازاقستان وبلىسىندا سۋ تاسقىنى قاۋپىنە بايلانىستى وبلىستىق كارديولوگيالىق ورتالىق عيماراتىندا ەمدەلىپ جاتقان پاتسيەنتتەر قالالىق كوپبەيىندى اۋرۋحاناعا اۋىستىرىلدى، وندا 111 توسەك-ورىن بەرىلدى. بارلىق 109 پاتسيەنت ەم الۋدا»، - دەدى رەسمي وكىل.
ايگەرىم ورازاليەۆ ماڭعىستاۋ وڭىرىندە تاسقىننان كەيىن ەمگە جۇگىنگەن تۇرعىندار تۋرالى مالىمەت ۇسىندى.
«6-ساۋىردە سۋ باسۋ قاۋپىنە بايلانىستى ماڭعىستاۋ وبلىسىنىڭ بەينەۋ اۋداندىق ورتالىق اۋرۋحاناسىنا جىلىوي اۋداندىق اۋرۋحاناسىنان 51 ناۋقاس كوشىرىلدى. ولاردىڭ بارلىعى ەمدەۋ حاتتامالارىنا سايكەس جوسپارلى كومەك الۋدى جالعاستىرۋدا. بەينەۋ قالاسىندا مەديتسينالىق كومەك كورسەتۋ ءۇشىن اقتاۋ قالاسىنداعى وبلىستىق ستاتسيونارلاردان قوسىمشا 8 دارىگەر ءىس-ساپارعا جىبەرىلدى»، - دەدى ول.
