تاسقىن سۋدى كادەگە جاراتۋ: ەلدىڭ بەس وبلىسىندا زەرتتەۋ جۇرگىزىلدى

دەپۋتاتتىڭ ايتۋىنشا، قازاقستاندا كوكتەمدە سۋ تاسقىنى بولعان وڭىرلەردىڭ ءوزى جازدا سۋ تاپشىلىعىنا تاپ بولۋى مۇمكىن. سوندىقتان عالىمدار تاسقىن سۋدى تەك قاۋىپ رەتىندە ەمەس، ساقتاپ، كەيىن پايدالانۋعا بولاتىن رەسۋرس رەتىندە قاراستىرۋدى ۇسىنىپ وتىر.

- كوكتەمدە قازاقستاننىڭ كەيبىر وڭىرلەرىندە اۋقىمدى سۋ تاسقىنى بولادى، ال جازدا سول اۋماقتاردىڭ وزىندە سۋ تاپشىلىعى سەزىلۋى مۇمكىن. وسى ورايدا تاسقىن سۋدى تەك قاۋىپ رەتىندە ەمەس، ساقتاۋدى ۇيرەنۋىمىز قاجەت رەسۋرس رەتىندە قاراستىرا الامىز با دەگەن سۇراق تۋىندايدى، - دەدى ايگۇل سقاقوۆا.

ونىڭ ايتۋىنشا، وسى ماسەلەنى زەرتتەۋگە ارنالعان عىلىمي جوبا جامبىل، الماتى، جەتىسۋ، اباي جانە شىعىس قازاقستان وبلىستارىن قامتىعان.

جوبانىڭ نەگىزگى ماقساتى - تاسقىن سۋدى جەر استىنداعى سۋ قاباتتارىنا جيناۋ مۇمكىندىگىن انىقتاۋ. حالىقارالىق تاجىريبەدە بۇل ءتاسىل Managed Aquifer Recharge, ياعني جەراستى سۋ قورىن باسقارىلاتىن ادىسپەن تولىقتىرۋ دەپ اتالادى.

زەرتتەۋ بارىسىندا عالىمدار سپۋتنيكتىك دەرەكتەردى، گەواقپاراتتىق جۇيەلەردى، جەر بەدەرىنىڭ تسيفرلىق ۇلگىلەرىن جانە گيدروگەولوگيالىق مودەلدەۋ ادىستەرىن پايدالانعان. سونىڭ كومەگىمەن تاسقىن سۋدى جيناۋعا قولايلى اۋماقتاردى انىقتاۋ مۇمكىندىگى قاراستىرىلعان.

ايگۇل سقاقوۆانىڭ سوزىنشە، بيىل اياقتالعان عىلىمي جوبانىڭ ناتيجەلەرىن عىلىم كوميتەتىنە تاپسىرۋ جوسپارلانىپ وتىر. بۇل دەرەكتەر الداعى ۋاقىتتا سۋ رەسۋرستارىن باسقارۋ سالاسىنداعى زەرتتەۋلەر مەن جاڭا شەشىمدەردى ازىرلەۋگە پايدالانىلۋى مۇمكىن.

ايتا كەتەيىك، بۇعان دەيىن وسى جيىندا قۇرىلتاي دەپۋتاتى اۋىل شارۋاشىلىعى سالاسىنداعى عىلىمي جوبالاردى قارجىلاندىرۋ مەرزىمىن قازىرگى 3 جىلدان 5-10 جىلعا دەيىن ۇزارتۋدى ۇسىنعان ەدى.