تاريحي جۇلدە: قازاقستان قۇراماسى شاحمات وليمپياداسىنىڭ كۇمىس جۇلدەگەرى

استانا. KAZINFORM - شاحماتتان قازاقستان ايەلدەر قۇراماسى ماجارستان استاناسى بۋداپەشتە ءوتىپ جاتقان 45-وليمپيادانىڭ كۇمىس جۇلدەگەرى اتاندى.

ءبىزدىڭ كوماندا سوڭعى تۋردا ا ق ش- پەن 2-2 ەسەبىمەن تەڭ ءتۇسىپ، 18 ۇپاي جينادى. ال وليمپيادانىڭ فاۆوريتى ءۇندىستان ايەلدەر مەن ەرلەر اراسىنداعى جارىستا التىننان القا تاقتى.

ايەلدەر قۇراماسىندا ءبيبىسارا اساۋبايەۆا، مەرۋەرت كاماليدەنوۆا، ءامينا قايىربەكوۆا، كسەنيا بالابايەۆا، الۋا نۇرمان سىنعا ءتۇستى. وليمپيادادا 1-2-ورىن العان ويىنشىلارعا ەڭبەك سىڭىرگەن سپورت شەبەرى اتاعى بەرىلەدى.

بۇكىلالەمدىك شاحمات وليمپياداسى 2 جىلدا ءبىر وتەدى. وسىعان دەيىنگى دودانى ءۇندىستاننىڭ چەنناي قالاسى قابىلداعان. سول كەزدە قازاقستان ايەلدەر كومانداسى (ءبيبىسارا اساۋبايەۆا، جانسايا ابدىمالىك، گۇلىسحان ناحبايەۆا، كسەنيا بالابايەۆا، نازەركە نۇرعالي) 352 ۇپايمەن ۇزدىك بەستىكتى تۇيىندەدى. جانسايا ابدىمالىك 1-تاقتا بويىنشا قولا جۇلدەگەر اتانعان. بۇل وسىعان دەيىنگى ەڭ ۇزدىك كورسەتكىش بولعان.

ستاتيستيكا:

ايەلدەر قۇراماسى 6-ورىن (2014-جىلى نورۆەگيا)

ايەلدەر قۇراماسى 8-ورىن (1996-جىلى ارمەنيا)

ايەلدەر قۇراماسى 11-ورىن (1994-جىلى ماسكەۋ)

ايەلدەر قۇراماسى 8-ورىن (1992-جىلى فيليپپين)

انىقتاما:

وليمپيادا 9 راۋندتان تۇراتىن شۆەيتساريالىق اشىق تۋرنير فورماتىندا وتەدى. ۋاقىتتى باقىلاۋ 40 ءجۇرىس ءۇشىن 90 مينۋت، سودان كەيىن ويىننىڭ قالعان بولىگىنە 30 مينۋت بەرىلەدى. بۇل كەزدە ءبىرىنشى جۇرىستەن كەيىن كەلەسىسىنە 30 سەكۋند بەرىلەدى.

ەسكە سالساق، پرەزيدەنت قاسىم-جومارت توقايەۆ شاحماتتان ايەلدەر قۇراماسىن جەڭىسىمەن قۇتتىقتادى.

اۆتور كۇنسۇلتان وتارباي