تاريحتا بولماعان جاعداي: ا ق ش-تا ەكى رەت ءولىم ينەكسياسى ەنگىزىلگەن ايەل ەسىن جىيدى

كريستا پايك تەننەسسي شتاتىنداعى اۋرۋحانانىڭ جانساقتاۋ بولىمىندە ەم الىپ جاتىر. ول وتكەن اپتادا ۇكىمدى ورىنداۋ كەزىندە ەس-ءتۇسسىز كۇيگە تۇسكەن. ايەلگە پەنتوباربيتال پرەپاراتى ەكى رەت ەنگىزىلگەنىمەن، ءولىم تىركەلمەگەن.

وسى ۋاقىتقا دەيىن دارىگەرلەر ونىڭ اعزاسىنان پرەپاراتتى شىعارۋعا باعىتتالعان ەم جۇرگىزگەن. ادۆوكاتتاردىڭ ايتۋىنشا، ەكى ءولىم دوزاسىنان كەيىن پايكتىڭ ەسىن جيىپ، سويلەي باستاۋى - مەديتسينا تۇرعىسىنان بۇرىن-سوڭدى بولماعان جاعداي.

بولجام ءالى دە بەلگىسىز. دەگەنمەن ونىڭ ۇزاق ۋاقىت بويى وڭالۋى قاجەت بولادى دەپ كۇتەمىز، - دەلىنگەن قورعاۋشىلار مالىمدەمەسىندە.

ادۆوكاتتار پايكتىڭ اۋرۋحانادا كىسەندەلىپ، توسەگىنە بەكىتىلگەن كۇيدە جاتقانىن دا حابارلادى. بۇعان دەيىن قورعاۋشىلار ايەلدىڭ دەنساۋلىعى مەن قان تامىرلارىنىڭ ەرەكشەلىكتەرىنە بايلانىستى ءولىم ينەكسياسىن جاساۋ قيىندىق تۋدىرۋى مۇمكىن ەكەنىن ەسكەرتكەن. ولاردىڭ سوزىنشە، پايكتا ترومبوتسيتوز بار ءارى قان تامىرلارى وتە جىڭىشكە بولعان.

ءولىم دوزاسى نەگە اسەر ەتپەدى؟

قورعاۋشىلارمەن جۇمىس ىستەگەن انەستەزيولوگ دجوەل زيۆوتتىڭ پىكىرىنشە، پايكقا ەنگىزىلگەن پەنتوباربيتالدىڭ ەكى دوزاسى پرەپارات قان اينالىمىنا تولىق تۇسكەن جاعدايدا ونىڭ ولىمىنە جەتكىلىكتى بولۋى ءتيىس ەدى.

مامان ءدارىنىڭ تامىرعا ەمەس، تەرى استىنا كەتۋى مۇمكىن ەكەنىن جوققا شىعارمايدى. مۇنداي جاعدايدا پرەپارات قان اينالىمىنا بىردەن تۇسپەي، تەرى استىنداعى تىندەرگە تارالۋى ىقتيمال. زيۆوتتىڭ بولجامىنشا، ايەلدىڭ امان قالۋىنا وسى جاعداي اسەر ەتۋى مۇمكىن.

دارىگەرلەر ەكى دوزانىڭ پايك دەنساۋلىعىنا قانداي زارداپ اكەلگەنىن ازىرگە ناقتى ايتا الماي وتىر. زيۆوت مەديتسينالىق كومەكتىڭ كەش كورسەتىلۋىنە بايلانىستى مي زاقىمدانۋى بولۋى مۇمكىن ەكەنىن ايتىپ، مۇنى انىقتاۋ ءۇشىن تولىق نيەۆرولوگيالىق تەكسەرۋ قاجەت ەكەنىن اتاپ ءوتتى.

كريمينولوگ ءارى فوردحەم ۋنيۆەرسيتەتىنىڭ زاڭ فاكۋلتەتىنىڭ پروفەسسورى دەبورا دەننو دا ايەلدىڭ ەسىن جيىپ، سويلەي باستاعانىنا تاڭعالعانىن جەتكىزدى.

ونىڭ مالىمەتىنشە، بۇعان دەيىن ا ق ش- تا ءولىم ينەكسياسى ارقىلى جازانى ورىنداۋ ارەكەتىنەن جەتى ادام امان قالعان. الايدا ولاردىڭ بارلىعىندا پرەپاراتتى تامىرعا ەنگىزۋ مۇمكىن بولماعان. ال پايكتىڭ جاعدايىندا ۋلى پرەپارات اعزاعا ەنگىزىلگەن. سوندىقتان ساراپشى بۇل وقيعانى بۇرىن-سوڭدى بولماعان جاعداي دەپ باعالاپ وتىر.

30 جىلدان استام ۋاقىت ءولىم جازاسىن كۇتكەن

كريستا پايك 18 جاسىندا اۋىر قىلمىس جاساعانى ءۇشىن سوتتالعان. تەرگەۋ مالىمەتىنە سايكەس، ول سول كەزدەگى 17 جاستاعى جىگىتى تاداريل شيپپەن بىرگە 19 جاستاعى كوللين سلەممەردى ۇرىپ-سوعىپ، ازاپتاپ ولتىرگەن. ولار ءبىر-بىرىمەن مىنەز-قۇلقىندا قيىندىقتارى بار جاس وسپىرىمدەرگە ارنالعان ورتالىقتا تانىسقان.

پايك تۇرمەدە 30 جىلدان استام ۋاقىت وتكىزدى. ول تەننەسسي شتاتىندا سوڭعى شامامەن 200 جىل ىشىندە ءولىم جازاسى ورىندالاتىن العاشقى ايەل بولۋى ءتيىس ەدى.

ەندى ونىڭ ءىسى قالاي جالعاساتىنى بەلگىسىز. تەننەسسي بيلىگى ۇكىمدى قايتا ورىنداۋعا ارەكەت جاساي ما، جوق پا - ازىرگە رەسمي شەشىم جاريالانعان جوق.

شتات گۋبەرناتورى بيلل لي جىل سوڭىنا دەيىن بارلىق ءولىم جازاسىن ورىنداۋدى ۋاقىتشا توقتاتتى. ال پايكتىڭ ادۆوكاتتارىنىڭ ءبىرى ستيۆەن فەررەل گۋبەرناتوردان ونىڭ جازاسىن كەمىندە ءومىر بويىنا باس بوستاندىعىنان ايىرۋ جازاسىنا اۋىستىرۋدى سۇرادى.

قورعاۋشىنىڭ ايتۋىنشا، پايك ءولىم جازاسىن ورىنداۋ كەزىندەگى اۋىر پروتسەدۋرادان ءوتتى، وعان دەيىن 30 جىلدان استام ۋاقىت تۇرمەدە وتىرىپ، سول كەزەڭنىڭ ەداۋىر بولىگىن جالعىز ادامدىق كامەرادا وتكىزگەن.

قازىر دارىگەرلەر ونىڭ جاعدايىن باقىلاۋدى جالعاستىرىپ جاتىر. ايەلدىڭ تولىق قالپىنا كەلە الاتىنى جانە پرەپاراتتىڭ ەكى دوزاسى دەنساۋلىعىنا ۇزاق مەرزىمدە قالاي اسەر ەتەتىنى ازىرگە بەلگىسىز.

el.kz