تاريحتا العاش رەت ج ي ادامدى جۇمىستان شىعارىپ جىبەردى

TIME باسىلىمىنىڭ حابارلاۋىنشا، Claude نەگىزىندە جاسالعان Luna اتتى ج ي-اگەنت سان-فرانسيسكوداعى Andon Market دۇكەنىن جانە وندا جۇمىس ىستەيتىن ادامداردى باسقارادى. شىلدەدە ول قىزمەتكەرلەردىڭ ءبىرىن جۇمىستان شىعارۋ جونىندە شەشىم قابىلداعان.

بۇعان دەيىن دە ءتۇرلى پلاتفورمالاردا اۆتوماتتاندىرىلعان جۇيەلەر قىزمەتكەرلەردىڭ جۇمىسىن توقتاتۋ تۋرالى شەشىمدەر قابىلداعان. الايدا زەرتتەۋشىلەر مۇنى ۇلكەن تىلدىك مودەل تىكەلەي مەنەدجەر قىزمەتىن اتقارىپ، قاراماعىنداعى ناقتى ادامدى جۇمىستان شىعارۋ تۋرالى شەشىمگە كەلگەن العاشقى بەلگىلى جاعداي دەپ وتىر.

Andon Labs مالىمەتىنشە، قىزمەتكەر 23 اۋىسىمنىڭ 17-سىنە كەشىگىپ كەلگەن. سوعان قاراماستان، Luna ۇزاق ۋاقىت بويى قاتاڭ شارا قولدانباعان. بۇعان ج ي جۇيەسىنىڭ شەكتەۋلى جۇمىس جادى اسەر ەتكەن. Claude بۇعان دەيىن قىزمەتكەرلەرگە ارنالعان ىشكى ەرەجەنى ءوزى ازىرلەگەنىمەن، كەيىن بۇل قۇجات ونىڭ جادىنان «جوعالىپ كەتكەن». سالدارىنان مودەل كەشىگۋلەردىڭ جۇيەلى تۇردە قايتالانىپ جۇرگەنىن بىردەن انىقتاي الماعان.

دۇكەننىڭ وزگە قىزمەتكەرلەرى دە ج ي-مەنەدجەردى تىم جۇمساق باسشى رەتىندە سيپاتتايدى. كەي كەزدەرى Luna جۇمىسشىلارعا كەشىككەنى ءۇشىن الاڭداماۋعا بولاتىنىن ايتىپ، رەسمي شارا قولدانۋدىڭ ورنىنا ەسكەرتۋ جاساۋمەن جانە قوسىمشا وقىتۋمەن شەكتەلگەن. Andon Labs باس ديرەكتورى لۋكاس پەتەرسسوننىڭ ايتۋىنشا، ادام-مەنەدجەر مۇنداي قىزمەتكەردى الدەقايدا ەرتەرەك جۇمىستان شىعارار ەدى. سوندىقتان كومپانيا بۇل شەشىمدى نەگىزسىز نەمەسە ادەپكە جات دەپ ەسەپتەمەگەن.

دەگەنمەن قىزمەتكەردى جۇمىستان شىعارۋ تۋرالى شەشىمدى Claude ەشكىمنىڭ ارالاسۋىنسىز قابىلدادى دەۋگە بولمايدى. دۇكەندى باسقارۋ جۋرنالدارىنا سايكەس، Andon Labs قىزمەتكەرى الدىمەن ج ي-دەن بۇرىن ازىرلەگەن ىشكى ەرەجەسىن تاۋىپ، قىزمەتكەردىڭ جۇمىس ءتارتىبىن سوعان سۇيەنە وتىرىپ باعالاۋدى سۇراعان. Claude كەشىگۋلەردى انىقتاعاننان كەيىن دە ادامدى بىردەن جۇمىستان شىعارماي، وعان رەسمي ەسكەرتۋ بەرۋدى ۇسىنعان.

وسىدان كەيىن كومپانيا وكىلى قىزمەتكەرمەن كەشىگۋلەرگە بايلانىستى بىرنەشە رەت سويلەسكەنىن ايتىپ، ونىڭ بۇل جۇمىسقا شىنىمەن ساي كەلەتىن- كەلمەيتىنىن قايتا ويلانۋدى تاپسىرعان. پەتەرسسون بۇل سۇراقتىڭ ج ي-دى بەلگىلى ءبىر شەشىمگە باعىتتاعانىن مويىندادى. تەك سودان كەيىن Claude قىزمەتكەرمەن ەڭبەك قاتىناسىن توقتاتۋدى ۇسىنعان.

سوڭعى شەشىمدى ادامدار تەكسەرىپ، جۇمىستان شىعارۋ ءراسىمىن دە Andon Labs قىزمەتكەرلەرى جۇزەگە اسىرعان. سوندىقتان بۇل وقيعانى ج ي-دىڭ تولىقتاي اۆتونومدى ارەكەتى رەتىندە باعالاۋعا ءالى ەرتە. Andon Market تاجىريبەسى 2026 -جىلدىڭ ناۋرىزىندا باستالعان. ج ي-اگەنتكە 100 مىڭ دوللار، كورپوراتيۆتىك كارتا جانە ينتەرنەتكە قولجەتىمدىلىك بەرىلىپ، دۇكەن اشىپ، ونى تابىسقا شىعارۋ مىندەتى قويىلعان. Luna تاۋارلاردى تاڭداۋ، باعا بەلگىلەۋ، جۇمىس كەستەسىن جاساۋ، قىزمەتكەرلەردى ىزدەۋ جانە سۇحبات وتكىزۋ سياقتى مىندەتتەردىڭ باسىم بولىگىن اتقارعان. دۇكەندە جۇمىس ىستەيتىن ادامدار Andon Labs كومپانياسىمەن ناقتى ەڭبەك شارتتارىن جاساسقان جانە زاڭمەن قاراستىرىلعان قۇقىقتارعا يە.

الايدا بەس اي ىشىندە دۇكەننىڭ باستاپقى 100 مىڭ دوللارى 61186 دوللارعا دەيىن ازايعان. زەرتتەۋشىلەر شىعىننىڭ ءبىر بولىگىن ج ي-دىڭ تىم جۇمساق باسقارۋ تاسىلىمەن جانە ءتيىمسىز بيزنەس شەشىمدەرىمەن بايلانىستىرادى. پەتەرسسوننىڭ پىكىرىنشە، بولاشاقتا ج ي-مودەلدەر كومپانيالاردى باسقارۋدى الدەقايدا جاقسى مەڭگەرۋى مۇمكىن. مۇنداي جۇيەلەر ەكونوميكالىق شەشىمدەر قابىلداعانىمەن، فيزيكالىق جۇمىستاردى ورىنداۋ ءۇشىن ءبارىبىر ادامدار قاجەت بولادى. سوندىقتان الداعى ۋاقىتتا قىزمەتكەرلەردىڭ ج ي-مەنەدجەرلەرگە باعىنۋى ءجيى كەزدەسەتىن جاعدايعا اينالۋى ىقتيمال.