تارازدىق مۇعالىم فيزيكا ساباقتارىن تيك-توكتا ءتۇسىندىرۋ ارقىلى الەمگە تانىلدى

استانا. قازاقپارات - تارازدا فيزيكا ءپانىنىڭ مۇعالىمى تيك-توك پلاتفورماسىندا «ورتالىق ازياداعى كرەاتيۆتى كونتەنت يەسى» اتاندى. مەيىرلان جۋسانبايەۆ فيزيكالىق زاڭدىلىقتاردى وقۋشىلىراعا تاجىريبە جاساۋ ارقىلى جەڭىل تىلدە تۇسىندىرەدى. قازىر جەلىگە جۇكتەگەن بەينەلەرى ميلليونداعان قارالىم جيناعان، - دەپ حابارلايدى 24KZ تەلەارناسى.

مەيىرلان جۋسانبايەۆ ۇستازدىق سالادا 13 جىل بويى ەڭبەك ەتەدى. قازىر ساباقتى قۇر تەوريامەن وقۋشىنىڭ ساناسىنا سىڭىرۋدەن ناتيجە جوق دەيدى ول. وسىعان بايلانىستى 4 جىل بۇرىن تىڭ تاسىلگە بەت بۇرعان.

فيزيكالىق فورمۋلالارعا زەرتحانالىق ءادىس جاساپ، ءتۇرلى زاڭدى بالالارعا تىرىدەي كورسەتىپ باستاعان. مۇنداي ءادىس وقۋشىلاردىڭ قىزىعۋشىلىعىن وياتىپ، قابىلەتىن دامىتقان.

«مەن ءوزىم مەكتەپ وقۋشىسى بولعان كەزدە مۇنداي ەكسپەريمەنتتەردى مۇعالىمدەر وتكىزبەيتىن. ياعني فيزيكانى ءتۇسىنۋ وتە قيىن بولاتىن. قازىرگى زاماندا قول استىمىزدا بۇكىل قۇرال- جابدىق بار. جاقسى فيزيك بولۋ ءۇشىن بالاعا تەك قانا قىزىعۋشىلىق كەرەك. ەگەر بالا وسى ەكسپەريمەنتتەردى ءوز قولىمەن جاسايتىن بولسا، ول ونى ءومىر باقي ەسىنە ساقتاپ قالادى»، دەيدى فيزيكا ءپانىنىڭ مۇعالىمى مەيىرلان جۋسانبايەۆ.

جاس مۇعالىم 120 عا جۋىق تاجىريبە جاساپ، ءبارىن تاسپاعا ءتۇسىرىپ جەلىگە جۇكتەگەن. قازىر ونىڭ بەينەساباقتارى 6 ميلليوننان استام قارالىم جينادى. تاجىريبەلەرى الەمدىك دەڭگەيدە ادىستەمەلىك قۇرالعا اينالىپ بارادى. قيىن ءپاندى فورمۋلامەن ەمەس، مىسالمەن ۇيرەتكەن مۇعالىمنىڭ ساباعىنا وقۋشىلار دا قىزىعا قاتىسادى.

«ساباقتار وتە قىزىق وتەدى. مىسالى مەتاللداردى ورتەيدى، پاراقتاردى ورتەيدى، جاندىرادى. قىزدىرادى. بۇل بىزگە ادرەنالين بەرەدى. ءبىزدىڭ قىزىعۋشىلىعىمىزدى وياتتى»، دەيدى وقۋشى جانايىم سەمبەكوۆا.

«مەن وليمپيادادان اعايدىڭ ۇيرەتكەنى بويىنشا ءبىرىنشى ورىن الدىم. ءبىزدىڭ اعاي بارلىعى ءوزىنىڭ قولىمەن كورسەتەدى، ياعني بارلىعىن تاجىريبە ارقىلى بىزگە جەتكىزەدى جانە ءبىز سونى كوزىمىزبەن كورگەندە ول بىزگە تۇسىنىكتىرەك بولادى»، دەيدى وقۋشى مەدينا ءابدىحاميت.

مەيىرلان 800-دەن اسا وقۋشىنى فيزيكاعا باۋلىعان. ءبىر قىزىعى سولاردىڭ جارتىسى وسى باعىتتى ماماندىق رەتىندە تاڭداپتى.

ەڭبەكقور ۇستاز 2023 -جىلى زياتكەرلىك مەكتەپتەر اراسىنداعى بايقاۋدا «جىل مۇعالىمى» اتاندى.

2024-تە تيك-توك جەلىسىندە ءبىلىم باعىتى بويىنشا «ورتالىق ازياداعى ۇزدىك كرەاتيۆتى كونتەنت يەسى» دەگەن ماراپات الدى. سونىمەن قوسا «قازاقستان مۇعالىمى» ۇلتتىق سىيلىعىن يەمدەندى. ەندىگى ماقساتى - «الەم مۇعالىمى» بايقاۋىندا باق سىناۋ.