«تۇمار» جانە «ۇركەر» سىيلىقتارىنا ءوتىنىم قابىلداۋ مەرزىمى ۇزارتىلدى
استانا. قازاقپارات - Qazaqstan Media Awards اياسىنداعى «تۇمار» جانە «ۇركەر» مەرەيتويلىق ۇلتتىق سىيلىقتارىنا ءوتىنىم قابىلداۋ مەرزىمى 2026 -جىلعى 6-قازانعا دەيىن ۇزارتىلدى. بۇل تۋرالى مادەنيەت جانە اقپارات مينيسترلىگى حابارلادى.
وتىنىمدەر بايقاۋدىڭ رەسمي QMA.kz سايتى ارقىلى جولدانادى.
بايقاۋعا 2025 -جىلعى 18-قىركۇيەك پەن 2026 -جىلعى 18-قىركۇيەك ارالىعىندا جاريالانعان نەمەسە ەفيرگە شىققان جۇمىستار قابىلدانادى. ۇلتتىق سىيلىقتار بايقاۋىنا قازاقستاندىق جۋرناليستەر، تەلەجۇرگىزۋشىلەر، مەدياجوبا اۆتورلارى مەن جاساۋشىلارى، رەداكتسيالار جانە شىعارماشىلىق ۇجىمدار قاتىسا الادى.
بايقاۋ نوميناتسيالارى:
تەلەۆيزيالىق جۋرناليستيكا:
1. ۇزدىك تەلەجۇرگىزۋشى
2. ۇزدىك تەلەۆيزيالىق ماتەريال (رەپورتاج، سۇحبات)
3. ۇزدىك تەلەسەريال
4. ۇزدىك اقپاراتتىق-تالدامالىق باعدارلاما
5. ۇزدىك دەرەكتى جوبا
6. قوعامدىق جاۋاپكەرشىلىك سالاسىنداعى ۇزدىك جوبا («زاڭ مەن ءتارتىپ»، «تازا قازاقستان»)
باسپا، ينتەرنەت جانە راديو جۋرناليستيكاسى:
1. جىلدىڭ ۇزدىك جۋرناليسى
2. جىلدىڭ ۇزدىك ماتەريالى (سۇحبات، رەپورتاج، ماقالا)
3. ۇزدىك تالدامالىق ماتەريال
4. ۇزدىك مەدياجوبا (YouTube، پودكاست)
5. ۇزدىك راديوجوبا
6. جۋرناليستيكانىڭ بولاشاعى: جاساندى ينتەللەكت سالاسىنداعى ۇزدىك جوبا
2026 -جىلى جاڭا تەحنولوگيالار مەن جۋرناليستيكانىڭ بولاشاعىنا ايرىقشا ءمان بەرىلىپ وتىر. بيىل العاش رەت جاساندى ينتەللەكت سالاسىنداعى جوبالارعا ارنالعان نوميناتسيا ەنگىزىلدى. بۇل مەدياداعى جاڭا تەحنولوگيالاردىڭ قولدانىسىن جانە وسى باعىتتاعى تىڭ جوبالاردى قامتيدى.
بايقاۋ جۇمىستارىن تانىمال جۋرناليستەر، سالاعا ەڭبەگى سىڭگەن ماماندار مەن مەديا ساراپشىلاردان قۇرالعان تاۋەلسىز قازىلار القاسى باعالايدى.
2026 -جىلى ۇلتتىق سىيلىقتاردىڭ 10 جىلدىعىنا وراي «تۇمار» جانە «ۇركەر» العاش رەت Qazaqstan Media Awards اياسىندا ءوتىپ جاتىر. ون جىل ىشىندە قوس سىيلىق وتاندىق مەديا سالاسىنداعى ايتۋلى جوبالاردىڭ بىرىنە اينالىپ، جۋرناليستيكا مەن مەديانىڭ دامۋىنا ۇلەس قوسقان جۋرناليستەردى، رەداكتسيالار مەن مەدياجوبالاردى جىل سايىن ماراپاتتاپ كەلەدى.
