«تۇمار» جانە «ۇركەر» مەرەيتويلىق ۇلتتىق سىيلىقتارىنا ءوتىنىم قابىلداۋ باستالدى
استانا. KAZINFORM - وسى جىلى «تۇمار» جانە «ۇركەر» ۇلتتىق سىيلىقتارىنا 10 جىل تولادى. مەرەيتويلىق شارا Qazaqstan Media Awards اياسىندا وتەدى.
وتكىزىلىپ كەلە جاتقان جىلدار ىشىندە «تۇمار» جانە «ۇركەر» ۇلتتىق سىيلىقتارى قازاقستاننىڭ مەديا سالاسىنىڭ ماڭىزدى بولىگىنە اينالىپ، وتاندىق جۋرناليستيكا مەن مەديانىڭ دامۋىنا ۇلەس قوسقان جۋرناليستەردى، رەداكسيالاردى جانە جوبالاردى جىل سايىن اتاپ ءوتىپ كەلەدى.
مەرەيتويلىق ءىس-شارا سىيلىقتار تاريحىنداعى ەرەكشە كەزەڭ بولماق. ويتكەنى وسى جولى «تۇمار» جانە «ۇركەر» سىيلىقتارى العاش رەت Qazaqstan Media Awards اياسىندا بىرىگەدى.
قازاقستان رەسپۋبليكاسى مادەنيەت جانە اقپارات مينيسترلىگىنىڭ باستاماسىمەن ۇيىمداستىرىلاتىن كونكۋرسقا مەدياكونتەنت وندىرۋمەن جانە تاراتۋمەن اينالىساتىن رەسپۋبليكالىق جانە وڭىرلىك تەلەارنالار، راديوستانتسيالار، باسپا جانە ينتەرنەت-باسىلىمدار قاتىسا الادى.
كونكۋرسقا 2025-جىلعى 18-قىركۇيەكتەن باستاپ 2026-جىلعى 18-قىركۇيەكتى قوسا العانداعى كەزەڭدە جاريالانعان نەمەسە ەفيرگە شىققان جۇمىستار قابىلدانادى. بايقاۋعا قازاقستاندىق ب ا ق جۋرناليستەرى، تەلەجۇرگىزۋشىلەر، مەدياجوبالاردىڭ اۆتورلارى مەن جاساۋشىلارى، رەداكسيالار جانە شىعارماشىلىق ۇجىمدار قاتىسا الادى.
كونكۋرسقا قاتىسۋعا وتىنىمدەر 2026-جىلعى 18-قىركۇيەك پەن 2-قازان ارالىعىندا قوسا العاندا QMA.kz سىيلىقتىڭ رەسمي سايتىندا ەكى نەگىزگى باعىت بويىنشا قابىلدانادى.
تەلەۆيزيالىق جۋرناليستيكا
ۇزدىك تەلەجۇرگىزۋشى
ۇزدىك تەلەۆيزيالىق ماتەريال (رەپورتاج، سۇحبات)
ۇزدىك تەلەسەريال
ۇزدىك اقپاراتتىق-تالدامالىق باعدارلاما
ۇزدىك دەرەكتى جوبا
قوعامدىق جاۋاپكەرشىلىك سالاسىنداعى ۇزدىك جوبا («زاڭ مەن ءتارتىپ»، «تازا قازاقستان» )
باسپا، ينتەرنەت جانە راديو جۋرناليستيكاسى
جىلدىڭ ۇزدىك جۋرناليستى
جىلدىڭ ۇزدىك ماتەريالى (سۇحبات، رەپورتاج، ماقالا)
ۇزدىك تالدامالىق ماتەريال
ۇزدىك مەدياجوبا (YouTube، پودكاست)
ۇزدىك راديوجوبا
جۋرناليستيكانىڭ بولاشاعى: جاساندى ينتەللەكت سالاسىنداعى ۇزدىك جوبا
2026-جىلى جۋرناليستيكانىڭ بولاشاعى مەن جاڭا تەحنولوگيالارعا ەرەكشە نازار اۋدارىلادى. مەديا سالاسىنىڭ جاڭا دامۋ باعىتتارىن كورسەتەتىن جاساندى ينتەللەكت سالاسىنداعى جوبالارعا ارنالعان نوميناتسيا العاش رەت ەنگىزىلىپ وتىر.
كونكۋرستىق جۇمىستاردى باعالاۋدى بەلگىلى جۋرناليستەردەن، سالانىڭ ەڭبەك سىڭىرگەن قايراتكەرلەرى مەن مەديا ساراپشىلاردان قۇرالعان تاۋەلسىز قازىلار القاسى جۇزەگە اسىرادى.
ايتا كەتەلىك مەملەكەتتىك ءتىل تاقىرىبىنداعى بايقاۋدا Kazinform ءتىلشىسى جۇلدەگەر اتانعان ەدى.
