تانىمال سپورتشى حابيب نۋرماگومەدوۆ التى جىلعا دەيىن سوتتالۋى مۇمكىن

Фото ©️ EADaily
Фото ©️ EADaily

استانا. KAZINFORM - تانىمال سپورتشى، UFC ۇيىمىنىڭ بۇرىنعى چەمپيونى حابيب نۋرماگومەدوۆتىڭ سالىق قىزمەتى الدىندا ۇلكەن قارىزى بار بولىپ شىقتى.

رەسەيلىك ب ا ق مالىمەتىنشە، حابيب 306 ميلليون 688 مىڭ 389 رۋبل (شامامەن 1,5 ميلليارد تەڭگەدەي) قارىزى بار بولىپ شىقتى. Mash باسىلىمى رەسەيدىڭ فەدەرالدىق سالىق قىزمەتى نۋرماگومەدوۆكە تيەسىلى Eagle FC پروموۋشەنى جانە سپورتشىنىڭ قايىرىمدىلىق قورىنىڭ ەسەپ-شوتىن بۇعاتتاعانىن حابارلادى.

ادۆوكات يگور بۋشمانوۆتىڭ سوزىنشە، سالىق تولەمەگەنى ءۇشىن نۋرماگومەدوۆ تۇرمەگە وتىرۋى دا مۇمكىن.

«ۇيىم سالىعىنان جالتارۋ - اۋىر قىلمىس. تولەنبەگەن سالىق سوماسى 10 ميلليوننان اسسا، بۇل ءۇشىن ر ف زاڭىنداعى 199-بابى بويىنشا 6 جىلعا دەيىن باس بوستاندىعىنان ايىرۋ تۋرالى زاڭ قاراستىرىلعان.

مۇنداي ءىستى رەسەيدىڭ تەرگەۋ كوميتەتى جۇرگىزەدى. ادەتتە ايىپكەر رەتىندە ۇيىم جەتەكشىسى جاۋاپقا تارتىلادى. سيرەك تۇردە - قۇرىلتايشى مەن باس بۋحالتەر. ايىپكەر سالىق پەن ءوسىمدى تولىق تولەسە جازادان قۇتىلادى»، - دەيدى ادۆوكات.

سوڭعى جاڭالىقتار