تانىمال اكتەر اسقار جۇمابەكوۆ 6,5 جىلعا سوتتالدى

 الماتىدا تانىمال اكتەر اسقار جۇمابەكوۆكە سوت ۇكىمى شىقتى، دەپ حابارلايدى Kazinform. №2-بوستاندىق اۋدانىنىڭ سوتىندا مەيمانداردى ۇرىپ-سوققان كاراوكە-باردىڭ قىزمەتكەرلەرىنە قاتىستى قىلمىستىق ءىس قارالدى. 

سوتتالۋشىلارعا بۇزاقىلىق جاسادى، بۇزاقىلىق پيعىلدا ءبىر توپ ادامنىڭ دەنساۋلىعىنا قاساقانا اۋىر جانە ورتاشا زيان كەلتىردى دەگەن ايىپ تاعىلدى.

سوتتا انىقتالعانداي، بىلتىر 28-قىركۇيەكتە قالاداعى كاراوكە-بارلاردىڭ بىرىندە قوناقتار مەن مەكەمە قىزمەتكەرلەرى اراسىندا جانجال شىعىپ، ونىڭ سوڭى توبەلەسكە ۇلاسقان.

وسى مەكەمەنىڭ كۇزەتشىلەرى مەن دي-دجەيى، سونداي-اق باردا بولعان ولاردىڭ تانىستارى جابىرلەنۋشىلەردى ۇرا باستاعان، ولار قاشۋعا ءماجبۇر بولعان.

الايدا سوتتالۋشىلار ولاردى كوشەدە قۋىپ جەتىپ، توبەلەستى جالعاستىرعان.

«سالدارىنان بەس جابىرلەنۋشىنىڭ ەكەۋىنە اۋىر جانە ورتاشا دەڭگەيدە دەنساۋلىعىنا زيان كەلگەن. توبەلەس كەزىندە سوتتالۋشىنىڭ ءبىرى پىشاق قولدانۋعا تىرىسقان»، - دەپ حابارلادى سوتتان.

سوتتالۋشى اسقار جۇمابەكوۆتىڭ بۇرىن دا ادام ۇرىپ-سوققانى ءۇشىن قىلمىستىق جاۋاپكەرشىلىككە تارتىلعانى بەلگىلى بولدى.

«سوتتالۋشىلاردىڭ كىناسى كۋاگەرلەر مەن جابىرلەنۋشىلەردىڭ ايعاقتارى، سوت ساراپتاماسى قورىتىندىسى، بەينەباقىلاۋ كامەراسىنا ءتۇسىپ قالعان بەينەجازبالار ارقىلى راستالدى»، - دەپ اتاپ ءوتتى سوتتىڭ باسپا ءسوز قىزمەتى.

سوتتالۋشىلار ءوز كىناسىن مويىنداعان جوق. جابىرلەنۋشىلەر دە كەشىرىم بەرمەدى.

پروكۋرور ولاردى 6 جىل مەرزىمگە باس بوستاندىعىنان ايىرۋدى سۇرادى.

سوت ۇكىمىمەن ج. ، ق. ، ت. ، س. ، ر. ، ن. جانە ك. قىلمىستىق كودەكستىڭ 293، 106 جانە 107-باپتارى بويىنشا كىنالى دەپ تانىلدى.

بارىنە 6 جانە 6,5 جىلعا باس بوستاندىعىنان ايىرۋ جازاسى تاعايىندالدى.

اسقار جۇمابەكوۆتى باس بوستاندىعىنان ايىرۋ تۇرىندەگى جازا 6 جىل 6 اي 15 كۇن مەرزىمگە تاعايىندالدى، ويتكەنى ول بۇعان دەيىن ق ر ق ك 107-بابى (ادامدى ۇرىپ-سوعۋ) بويىنشا كىنالى دەپ تانىلعان.

سونىمەن قاتار، سوتتىڭ الدىڭعى ۇكىمى بويىنشا وتەلمەگەن مەرزىمىنە بايلانىستى وعان 15 كۇن قوسىلدى.

سوت ۇكىمى زاڭدى كۇشىنە ەنگەن جوق.

اكتەردىڭ ءوزى كىناسىز ەكەنىن ايتىپ، پرەزيدەنتكە ۆيدەوۇندەۋ جاسادى.

«قازاقستان رەسپۋبليكاسىنىڭ ازاماتى رەتىندە، قۇرمەتتى پرەزيدەنت، سىزدەن ءوتىنىپ، كومەك سۇراعىم كەلىپ تۇر. مىنا ۆيدەونى تۇسىرۋگە ءماجبۇر بولىپ تۇرمىن. سەبەبى باسىمدا ءبىر ءىس بولىپ جاتىر. قۇرمەتتى سوت، ءوزىم حالىقتىڭ الدىندا جۇرگەن اداممىن، ونەر ادامىمىن، اكتەرمىن. سول سەبەپتى وسى ۆيدەو سىزگە جەتەدى دەگەن ۇمىتتەمىن»، - دەدى ول.

اۆتور

الما مۇقانوۆا