تامارا دۇيسەنوۆا كىمدەرگە حيدجابپەن جۇمىسقا بارۋعا بولاتىنىن ايتتى

استانا. KAZINFORM - پرەمەر-ءمينيستردىڭ ورىنباسارى تامارا دۇيسەنوۆا وقۋ-اعارتۋ، عىلىم جانە جوعارى ءبىلىم مينيسترلىكتەرىنىڭ بىرلەسكەن القا ماجىلىسىنەن كەيىن جۇمىستا حيدجاب كيۋ ماسەلەسىنە بايلانىستى پىكىر ءبىلدىردى.

«جالپى ول جونىندە ەشقانداي نورما جوق. ءبىراق وزدەرىڭىز دە بىلەسىزدەر. بۇل جونىندە مەملەكەت باسشىسى دا پىكىرىن ايتتى. ەستەرىڭىزدە بولسا، اسىرەسە وتكەن جىلى بۇل ماسەلە مەكتەپكە بايلانىستى كوپ بولدى. ونى ەگەر ازامات ءوزى تاڭداسا، ءوزىنىڭ تاڭداۋى بولسا، ول ونىڭ كونستيتۋتسيالىق قۇقىعى»، - دەدى ۆيتسە-پرەمەر جۋرناليستىڭ سۇراعىنا بەرگەن جاۋابىندا.

ب ا ق وكىلى: «ءتىپتى مەملەكەت قىزمەتشىسىنە دە حيدجابپەن جۇمىسقا كەلۋگە رۇقسات بار ما؟» - دەپ ناقتىلادى.

«ول ءوزىنىڭ قۇقىعى عوي. سەبەبى وعان ەشقانداي شەكتەۋ جوق. ءبىراق ءبىز قانداي مەملەكەت ەكەنىمىزدى ۇمىتپايىق. ءبىز ءوزىمىزدى زايىرلى مەملەكەتپىز دەپ ەسەپتەيمىز. سوندىقتان دا ءبىز سول كونستيتۋتسياعا سايكەس جۇمىس ىستەۋىمىز كەرەك»، - دەدى تامارا دۇيسەنوۆا.