تامارا دۇيسەنوۆا شاحتەرلەر ءولىمى تۋرالى: ۇكىمەتتىڭ كىناسى جوق دەپ ايتا المايمىن
«ارسەللورميتتال تەمىرتاۋدىڭ» اكسيونەرلەرى ۋكراينا، گەرمانيا سياقتى ەلدەردە ءوندىرىس قاۋىپسىزدىگىن ساقتايدى دا، نەلىكتەن قازاقستانداعى تالاپتارعا سالعىرت قارايدى؟
ۇكىمەت وتىرىسىنان كەيىن ءوتىپ جاتقان باسپا ءسوز كونفەرەنتسياسىندا جۋرناليست پرەمەر-ءمينيستردىڭ ورىنباسارى تامارا دۇيسەنوۆاعا وسىنداي سۇراق قويدى، دەپ حابارلايدى Kazinform اگەنتتىگى.
«ەڭبەك قاۋىپسىزدىگىنە بايلانىستى ستاندارتتاردىڭ ءبارى ميتتالدىڭ الدىنا، كومپانيانىڭ الدىنا قويىلعان. ۋكراينادا ءدال وسىنداي جاعداي بولدى. مەن ول كومپانيانىڭ شەتەلدەگى كاسىپورىندارىنا بارىپ، جۇمىس ورىندارىمەن تانىسقانمىن. قوندىرعىلار قانداي، ولار جۇمىسكەرلەرگە قانداي جاعداي جاساپ وتىرعانىن كوردىم. ەندى بارلىق جەردە كەرەمەت جاساپ قويىپتى دەپ ايتا المايمىن. سونىڭ ىشىندە ءبىزدىڭ ماسەلەمىزگە ولاردىڭ سالعىرتتىعى بولعان. سوڭعى جىلدارى ول كىسىلەرگە جۇمىس ورىندارى جونىندە وتە قاتتى ەسكەرتۋ بەرگەنبىز»، — دەدى تامارا دۇيسەنوۆا.
جۋرناليست «ينۆەستوردىڭ سالعىرتتىق تانىتۋىنا ۇكىمەتتىڭ جەمقورلىعى اسەر ەتكەن جوق پا؟» دەپ سۇرادى.
«سوڭعى ءۇش جىلدىڭ ىشىندە ءبىز قويعان تالاپتاردى كەزەڭ-كەزەڭىمەن ورىنداي باستادى. ءبىراق ءبارىن جولعا قويدى دەپ ايتا المايمىن. سەبەبى ءوندىرىس قاۋىپسىزدىگى بويىنشا ولاردىڭ ءوز تالاپتارى دا بولعان. «ارسەلورميتتال» — 100 پايىز جەكە كومپانيا. ۇكىمەتتىڭ ەشقانداي قاتىسى جوق. سوندىقتان ۇكىمەت تاراپىنان جەمقورلىق بار دەپ ايتۋعا بولمايدى»، — دەدى ۆيتسە-پرەمەر.
«ياعني، ۇكىمەتتىڭ بۇل جەردە كىناسى جوق پا؟» دەپ ناقتىلادى ب ا ق وكىلى.
ۇكىمەت باسشىسىنىڭ ورىنباسارى ولاي دەپ كەسىپ ايتۋعا بولمايتىنىن جەتكىزدى.
«ۇكىمەتتىڭ كىناسى جوق دەپ ايتا المايمىز. ارينە، باقىلاۋدا كەمشىلىكتەر بولۋى مۇمكىن، بولادى دا. سەبەبى ادام فاكتورى بار جەردە بارلىق ۋاقىتتا ونداي بولادى. دەگەنمەن بۇل جەردە ميتتالدىڭ جالپى كىناسى كوبىرەك دەپ ويلايمىن»، — دەدى ۆيتسە-پرەمەر.
