تامارا دۇيسەنوۆا ءار ءتورتىنشى بالاعا 5 مىڭ دوللار تولەۋ ۇسىنىسىنا پىكىر ءبىلدىردى
استانا. KAZINFORM - پرەمەر- ءمينيستردىڭ ورىنباسارى تامارا دۇيسەنوۆا وقۋ- اعارتۋ، عىلىم جانە جوعارى ءبىلىم مينيسترلىكتەرىنىڭ بىرلەسكەن القا ماجىلىسىنەن كەيىن ءار ءتورتىنشى بالاعا 5 مىڭ دوللار تولەۋ ۇسىنىسىنا پىكىر ءبىلدىردى.
«بۇل جونىندە ايتساق، بيىل مەملەكەت باسشىسىنىڭ تاپسىرماسى بويىنشا 1-قاڭتاردان باستاپ «ۇلتتىق قور - بالالارعا» دەگەن جوبا ىسكە اسا باستادى عوي. سوعان سايكەس سول قاراجاتتىڭ ءبارى بالالاردىڭ باستاپقى كاپيتالى رەتىندە ەسەپتەلەدى. سوندىقتان ءبىز ول ماسەلەنى ءتورتىنشى بالا ەمەس، بارلىق بالالارعا بەرۋ ارقىلى 18 گە دەيىنگى بالالاردىڭ ءبارىنىڭ باستاپقى كاپيتال ماسەلەسى شەشىلدى دەپ ايتۋىمىزعا بولادى»، - دەدى ول ب ا ق وكىلىنىڭ ساۋالىنا بەرگەن جاۋابىندا.
ەسكە سالساق، ءماجىلىس دەپۋتاتى گاۋحار تاناشيەۆا سول كەزدەگى پرەمەر- مينيستر ءاليحان سمايىلوۆقا جولداعان ساۋالىندا ەلدەگى دەموگرافيالىق احۋالدى «وتباسى كاپيتالى» باعدارلاماسى ارقىلى جاقسارتۋدى ۇسىنعان بولاتىن.
اۆتور
ەسىمجان ناقتىباي
