تاۋلىك ىشىندە كۇندە 29 جارقىل تىركەلدى
استانا. KAZINFORM - ءبىر تاۋلىكتە كۇندە 29 جارقىل تىركەلدى، بۇل 2000 -جىلدان بەرگى ەڭ جوعارى كۇندەلىكتى كورسەتكىش، ياعني 2022-جىلدىڭ مامىرىندا جانە 2024-جىلدىڭ جەلتوقسانىندا ورناتىلعان رەكوردپەن تەڭ.
بۇل تۋرالى رەسەي عىلىم اكادەمياسىنىڭ عارىشتىق زەرتتەۋلەر ينستيتۋتى مالىمدەدى.
NOAA الەمدىك كاتالوگىنە سايكەس، بارلىق 29 جارقىل ءبىر تاۋلىك ىشىندە بولدى. بۇعان دەيىن تۋرا وسىنشا جارقىل 2022-جىلدىڭ 5-مامىرىندا جانە 2024-جىلدىڭ 10-جەلتوقسانىندا بايقالعان. دەگەنمەن، كۇندە 21-عاسىردا جارقىلدار سانى 30 عا جەتكەن ەمەس.
- بۇل وقيعانىڭ ەرەكشەلىگى سول، بارلىق جارقىل 4566 ءنومىرلى ءبىر داقتار توبىندا بولدى. قازىرگى ۋاقىتتا ول كۇن ديسكىسىنىڭ ورتالىق بولىگىندە ورنالاسقان. سالىستىرۋ ءۇشىن، 2022-جىلدىڭ مامىر ايىندا جارقىلدار ەكى كۇن داقتارى توبىندا، ال 2024-جىلدىڭ جەلتوقسانىندا بەس داقتار توبىندا تىركەلگەن بولاتىن، -دەلىنگەن ەسەپتە.
بۇلاردىڭ كوپشىلىگىندە C جانە M كلاسىنا جاتاتىن جارقىلدار باسىم بولدى. ساراپشىلاردىڭ باعالاۋى بويىنشا، سالىستىرمالى تۇردە قۋاتى ازداۋ ءارى ءجيى بولاتىن جارقىلدار ەرەكشە قۋاتتى جارىلىستارعا قاجەت ەنەرگيانىڭ جينالۋىنا جەتكىلىكتى ۋاقىت قالدىرماۋى مۇمكىن. كۇن بەلسەندىلىگىنىڭ بۇل ۇلگىسى جەرگە جەكەلەگەن، وتە قۋاتتى جارقىلدارعا قاراعاندا ازىراق قاۋىپ توندىرەدى.
رەكوردتىق دەڭگەيدەگى وسى جارقىلدىڭ بارلىعى 2020-جىلى باستالعان كۇن سيكلىندە تىركەلىپ وتىر. بۇعان دەيىنگى ەكى تسيكلدە جەكەلەگەن جارقىلداردىڭ قۋاتى جوعارى بولدى. 2020-جىلدان بەرى كۇندە X10 نەمەسە ودان جوعارى كلاستى بىردە-ءبىر جارقىل تىركەلگەن جوق.
كۇننىڭ جارقىلدارى رەنتگەن ساۋلەلەرىنىڭ قۋاتى بويىنشا بەس كلاسقا جىكتەلەدى: A، B، C، M جانە X. ولار جەردە ەنەرگەتيكالىق جۇيەلەردىڭ جۇمىسىنا، قۇستار مەن جانۋارلاردىڭ كوشى-قونىنا اسەر ەتەتىن، سونداي- اق پوليارلىق شۇعىلالاردىڭ باقىلاۋ ايماعىن كەڭەيتەتىن ماگنيتتىك داۋىلداردى تۋدىرۋى مۇمكىن.
18-قاڭتار كەشىندە تىركەلگەن 2026-جىلعى العاشقى قۋاتتى كۇن جارقىلى X1,9 دەڭگەيىنە جەتكەن بولاتىن.
كەشە كۇننەن ءبولىنىپ شىققان پلازما اعىنىنىڭ جەرگە جەتۋىنەن، عالامشاردا Kp5+ يندەكسىمەن ماگنيتتىك داۋىل تىركەلدى.
