تاليبان ايەلدەرگە ەندى ساتۋشىلارمەن ساۋدالاسۋعا تىيىم سالدى

استانا. KAZINFORM - تاليباننىڭ ىزگىلىكتى ناسيحاتتاۋ جانە جاماندىقتىڭ الدىن الۋ مينيسترلىگى ءوزىنىڭ جاڭا زاڭى ارقىلى ايەلدەرگە قاتىستى شەكتەۋلەردى كۇشەيتتى.

اتاپ ايتقاندا، ايەلدەرگە ساتۋشىلارمەن ساۋدالاسۋعا تىيىم سالىندى. بۇل تۋرالى Hasht e Subh Daily حابارلادى.

كەيبىر پروۆينتسيالارداعى «تاليباننىڭ» مورالدىق پوليتسياسى ەر ادامدارعا ايەلدەرىنە قاتىستى ءتيىستى بۇيرىقتار شىعارعانى اتاپ ءوتىلدى. ولار ايەلدەر ساتۋشىلارمەن ساۋدالاسقان كەزدە ولاردىڭ داۋىسىن بەيتانىس ەر ادامدار ەستيتىنىن جانە بۇل «ەركەكتەردى ازعىراتىنىن» العا تارتتى.

تاليبانداردىڭ پىكىرىنشە، ايەلدەر سويلەسپەي، ساۋدالاسپاي ساۋدا جاساۋى كەرەك.

مورال پوليتسياسى وزدەرىنىڭ جاڭا زاڭدارىن ورىنداۋ ءۇشىن زورلىق-زومبىلىق ارەكەتىن كۇشەيتتى دەلىنەدى. ازاماتتار بۇل زاڭعا قاتتى الاڭداۋشىلىق ءبىلدىردى. ولار بۇل قىسىم، كەك الۋ، قۋعىن-سۇرگىن جانە جاپپاي قورلاۋ سەكىلدى جاعدايلاردى تۋدىرادى دەيدى. «تاليبان» ايەلدەردىڭ قولعاپ كيىپ، بەتىن تولىعىمەن جابۋى كەرەك ەكەنىن العا تارتتى.

ايتا كەتەيىك، قازاقپارات اگەنتتىگى ءتىلشىسى «اۋعان كارتسەرى: تاليبان نەگە ايەلدەردى ادام قۇقىعىنان ايىردى» تاقىرىبىندا تالداۋ جاساعان بولاتىن.

اۆتور

جاراسقان نۇرىبايەۆ