تاۋلى قاراباق رەسپۋبليكاسى جويىلادى

مويىندالماعان تاۋلى قاراباق رەسپۋبليكاسىنىڭ باسشىسى سامۆەل شاحرامانيان قاراباقتىڭ بارلىق مەملەكەتتىك مەكەمەلەرى مەن ۇيىمدارىن تاراتۋ تۋرالى جارلىققا قول قويدى.

Фото: armenpress.am
Фото: из открытых источников

Armenpress بۇل تۋرالى اقپاراتتىق شتابقا سىلتەمە جاساپ جازدى، دەپ حابارلايدى قازاقپارات.

جارلىقتا شەشىم شىعارۋ كەزىندە قازىرگى كۇردەلى اسكەري-ساياسي جاعدايعا بايلانىستى ارتساح حالقىنىڭ فيزيكالىق قاۋىپسىزدىگى مەن ومىرلىك ماڭىزدى مۇددەلەرىن قامتاماسىز ەتۋ باسىمدىعى نەگىزگە الىنعانى، رەسەي بىتىمگەرلىك كونتينگەنتى قولباسشىلىعىنىڭ اراعايىندىق ەتۋىمەن ازەربايجان رەسپۋبليكاسى وكىلدەرىمەن قول جەتكىزىلگەن كەلىسىم (وندا تاۋلى قاراباق تۇرعىندارىنىڭ، ونىڭ ىشىندە قارۋىن تاستاعان اسكەري قىزمەتشىلەردىڭ ءوز مۇلكىمەن جانە كولىگىمەن لاچين ءدالىزى بويىنشا ەركىن، ەرىكتى جانە كەدەرگىسىز ءوتۋى تۋرالى ايتىلعان) ەسكەرىلگەنى، سونداي-اق قاراباق كونستيتۋتسياسىنىڭ 93-بابى باسشىلىققا الىنعانى ايتىلعان.

جارلىق ءماتىنى:

2024-جىلعى 1- قاڭتارعا دەيىن ۆەدومستۆولىق باعىنىستاعى بارلىق مەملەكەتتىك مەكەمەلەر مەن ۇيىمدار تاراتىلسىن جانە تاۋلى قاراباق (ارتساح) رەسپۋبليكاسى ءوز قىزمەتىن توقتاتسىن.

تاۋلى قاراباق تۇرعىندارى، سونىڭ ىشىندە رەسپۋبليكادان تىس جەرلەردەگى تۇرعىندارعا وسى جارلىق كۇشىنە ەنگەننەن كەيىن بولاشاقتا تاۋلى قاراباقتا قالۋ (قايتۋ) مۇمكىندىگى تۋرالى تاۋەلسىز جانە جەكە شەشىم قابىلداۋ ماقساتىندا ازەربايجان رەسپۋبليكاسى ۇسىنعان رەينتەگراتسيا شارتتارىمەن تانىسسىن».

سونداي-اق قۇجات جاريالانعان ساتتەن باستاپ كۇشىنە ەنەتىنى كورسەتىلگەن.

سوڭعى جاڭالىقتار