تاۋەلسىزدىكتىڭ 35 جىلدىعىنا 35 كۇن قالدى: قازاقستان وڭىرلەرى مەرەكەگە قالاي دايىندالىپ جاتىر
استانا. KAZINFORM – ق ر تاۋەلسىزدىگىنىڭ 35 جىلدىعىنا 35 كۇن قالدى. مەملەكەتتىك مەرەكە قارساڭىندا ەلوردا جانە وڭىرلەردە كوشەلەر، عيماراتتار جانە قوعامدىق ورىندار مەيرامعا ساي بەزەندىرىلە باستادى، دەپ حابارلايدى Kazinform ءتىلشىسى.
بيىل تاۋەلسىزدىكتىڭ 35 جىلدىعىنا ارنالعان رەسمي مەرەكەلىك رامىزدەر ازىرلەندى. ولار قالالىق كەڭىستىكتەردى بەزەندىرۋدە، سونداي-اق مەرەيتويعا ارنالعان مادەني، قوعامدىق جانە باسقا دا ءىس-شارالاردا قولدانىلادى. بۇل مەرەكەلىك باستامالارعا ءبىرىڭعاي ۆيزۋالدى ستيل بەرۋگە مۇمكىندىك بەرەدى جانە ەل بويىنشا مەرەكەلەردىڭ جالپى تاقىرىبىن كورسەتەدى.
استانا اكىمدىگىنىڭ مالىمەتى بويىنشا، مەرەكە قارساڭىندا ەلورداداعى عيماراتتار مەن LED ەكراندار تاۋەلسىزدىك تاقىرىبىنا وراي بەزەندىرىلدى.
3D LED ەكراندا، اينالمالى دوڭگەلەكتە، «قازاقستان تەمىر جولى» ۇ ك» ا ق عيماراتىنىڭ قاسبەتىندە جانە قالانىڭ باسقا دا كورىكتى جەرلەرىندە مەرەكەلىك بەينەلەر پايدا بولدى.
قىزىلوردا مەن وبلىستىڭ اۋدان ورتالىقتارىندا دا مەرەكەگە دايىندىق باستالدى. تاقىرىپتىق سۋرەتتەر LED ەكرانداردا، عيماراتتاردىڭ قاسبەتتەرىندە جانە اينالمالى دوڭگەلەكتە كورسەتىلۋدە.
جەتىسۋ وبلىسىندا دا حالىق كوپ شوعىرلاناتىن قوعامدىق ورىنداردا، اتاپ ايتقاندا، مەديتسينالىق مەكەمەلەردىڭ، ساۋدا ۇيلەرى مەن ساۋدا- ويىن-ساۋىق ورتالىقتارىنىڭ ماڭىندا جانە كەلۋشىلەر كوپ بولاتىن وزگە دە ورىنداردا 21 LED- ەكران ىسكە قوسىلدى. مەرەكەىك اقپاراتتىق ناۋقان تالدىقورعان قالاسىن، سونداي-اق سارقان، اقسۋ، ەسكەلدى، پانفيلوۆ، كەربۇلاق جانە كوكسۋ اۋداندارىن دا قامتىدى.
مەرەكەلىك بەزەندىرۋلەر ەلىمىزدىڭ باسقا ايماقتارىندا دا ورناتىلا باستادى. ناقتىراق ايتقاندا، قاراعاندىدا، شىعىس قازاقستان وبلىسىنداعى وسكەمەندە جانە اقمولا وبلىسىنىڭ ەلدى مەكەندەرىندە تاقىرىپتىق LED ەكراندار پايدا بولدى.
ەسكە سالا كەتەيىك، تاۋەلسىزدىك كۇنى «قازاقستان رەسپۋبليكاسىنىڭ مەملەكەتتىك تاۋەلسىزدىگى تۋرالى» قازاقستان رەسپۋبليكاسىنىڭ زاڭىنا سايكەس اتالىپ وتەدى. قازاقستان ەگەمەندىگى تۋرالى زاڭدى جوعارعى كەڭەس 1991-جىلى 16-جەلتوقساندا قابىلداعان بولاتىن.
تاۋەلسىزدىك الۋ قازاقستاننىڭ قازىرگى تاريحىنىڭ باستاۋى بولدى. ول ەلىمىزدىڭ دەربەس ەگەمەندى مەملەكەت قۇرۋىنا، ۇلتتىق ەكونوميكاسى مەن مادەنيەتىن دامىتۋىنا جانە تاۋەلسىز سىرتقى ساياسات جۇرگىزۋىنە مۇمكىندىك بەردى.
ەسكە سالا كەتەيىك، قازاقستاننىڭ جاڭا كونستيتۋتسياسىندا «تاۋەلسىزدىك» جانە «ەگەمەندىك» سوزدەرى باس ارىپپەن جازىلدى.
