«تاۋەلسىزدىك ۇرپاقتارى» گرانتىنا قالاي قاتىسۋعا بولادى
استانا. قازاقپارات - 2026-جىلى «تاۋەلسىزدىك ۇرپاقتارى» گرانتى اياسىندا 30 جاسقا 3 ميلليون تەڭگەدەن قارجى بەرىلەدى.
بۇل تۋرالى ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا ق ر مادەنيەت جانە اقپارات مينيسترلىگى جاستار جانە وتباسى ىستەرى كوميتەتىنىڭ ءتوراعاسى قايرات قامباروۆ مالىمدەدى.
ونىڭ ايتۋىنشا، كونكۋرس ەكى كەزەڭنەن تۇرادى. الدىمەن وتىنىمدەر قابىلدانىپ، قارالادى. كەيىن جوبالار باعالانىپ، ارنايى كوميسسيا جەڭىمپازداردى انىقتايدى. وتىنىمدەر ەلەكتروندىق فورماتتا ارنايى Google-فورما ارقىلى قابىلدانادى. سىلتەمە مينيسترلىكتىڭ رەسمي سايتىندا جانە اقپاراتتىق رەسۋرستارىندا جاريالانادى. قۇجات قابىلداۋ 21-ماۋسىمعا دەيىن جالعاسادى.
قاتىسۋشىلار ءوتىنىم نىسانىن تولتىرىپ، قاجەتتى قۇجاتتاردى قوسا ۇسىنۋى ءتيىس. بەلگىلەنگەن مەرزىمنەن كەيىن جىبەرىلگەن وتىنىمدەر قارالمايدى.
- كونكۋرس قورىتىندىسى بويىنشا جىل سوڭىنا دەيىن 30 ادامعا 3 ميلليون تەڭگەدەن گرانت بەرىلەدى. تولىق اقپاراتتى مادەنيەت جانە اقپارات مينيسترلىگىنىڭ رەسمي سايتىنان جانە الەۋمەتتىك جەلىدەگى پاراقشالارىنان الۋعا بولادى، - دەدى كوميتەت ءتوراعاسى.
سونىمەن قاتار 2026-جىلى وڭىرلەردە جالپى سوماسى 215 ميلليون تەڭگە بولاتىن 184 گرانت بەرۋ جوسپارلانىپ وتىر.
ايتا كەتەيىك، «تاۋەلسىزدىك ۇرپاقتارى» گرانتى ق ر ۇكىمەتىنىڭ قاۋلىسىمەن 2021-جىلى تاعايىندالدى. گرانت بەرۋدەگى ماقسات - بەلسەندى شىعارماشىل جاستار قاۋىمداستىعىن قالىپتاستىرۋ، جاستاردىڭ جاڭا جانە قولدانىستاعى باستامالارىن مەملەكەتتىك قولداۋ. ونىڭ مولشەرى مەن سانىن ۇكىمەت جىل سايىن بەلگىلەيدى.
سونداي-اق بۇعان دەيىن ۆولونتەرلىك باستامالارعا ارنالعان گرانت بايقاۋى باستالعانىن جازعانبىز.
