تالدىقورعاندىق ستۋدەنتتىڭ جۇمباق ءولىمىنىڭ سىرى جەتى اي وتسە دە ءالى اشىلمادى
تالدىقورعان. KAZINFORM - جەتىسۋ وبلىسىندا جاتاقحانادا جۇمباق جاعدايدا قايتىس بولعان ستۋدەنت قىزدىڭ تۋىستارى تەرگەۋدىڭ سوزىلىپ كەتكەنىنە نارازى.
16 جاستاعى زارينا بەرىكوۆا 28-اقپان كۇنى تالدىقورعان قالاسىنداعى «جىگەر» جاتاقحاناسىندا اياقاستى قايتىس بولعان. سودان بەرى 7 اي وتسە دە، قىلمىستىق ءىس ءالى سوتقا جەتپەگەن.
ەسكەلدى اۋدانىنىڭ تۇرعىنى زارينا بەرىكوۆا 9-سىنىپتان كەيىن تالدىقورعان قالاسىنداعى يننوۆاتسيالىق كوللەدجگە تۇسەدى. ءمۇعالىم بولۋدى ارمانداعان بويجەتكەن نەبارى 6 اي عانا وقىپ، بەلگىسىز جاعدايدا كوز جۇمعان.
«مىنە 7 اي بولدى، ماعان ءالى جۇمباق نەدەن قايتىس بولعانى. ءبىر اقيقاتى بولۋ كەرەك قوي. وسى ۋاقىتقا دەيىن ءبىر شەتى شىعۋ كەرەك ەدى، ءىس تەرگەلىپ جاتىر دەيدى نەشە ايدىڭ ءجۇزى بولدى. ەسىكتەرىن قاعىپ بارامىز، ەشقانداي ءالى اقيقات جوق»، - دەيدى زارينانىڭ اناسى جازيرا توعاسبايەۆا.
اناسىنىڭ ايتۋىنشا، زارينا جاتاقحانادا كومەندانتتىڭ بولمەسىندە كوز جۇمعان. ال وندا نە بولعانى ازىرگە بەيمالىم. ءبىلىم ورداسىنداعىلار اياقاستى تالىپ قالدى دەگەندى ايتقان. ءبىراق تۋىستارى زارينانىڭ ەشبىر سىرقاتى جوق ەكەنىن، ءتىپتى ۋايىمى دا بولماعانىن ايتادى. ولار بەينەكامەرادان بويجەتكەننىڭ سول بولمەگە ءوز اياعىمەن كىرىپ، كەرى شىقپاعانىن جەتكىزدى.
«بالا ءوز اياعىمەن 20:04 تە ول بولمەگە كىرىپ تۇر نەگىزى. سول ارالىقتا ەكى جەدەل جاردەم كەلگەن. قىزىمىزعا ەشقانداي العاشقى كومەك كورسەتىلمەگەن. ءبىرىنشى ەكسپەرتيزادا نوشپادان ۋلانعان دەپ كورسەتىپ بەردى. وعان ءبىزدىڭ كۇمانىمىز بار. ەگەر كوپ مولشەردە ىشەتىن بولسا اسقازانىنان تابىلۋى كەرەك ەدى. جۋىندىرۋعا ءوزىم كىردىم. سول كەزدە بايقادىم وڭ جاق كوزى جانە استىڭعى ەرنى ىشىنەن جىرىلىپ، كوگەرىپ قالعان. ونى ءبىرىنشى ەكسپەرتيزادا دا كورسەتىپ بەرگەن بىزگە. قاتتى زاتتان پايدا بولعان تراۆما دەپ»، - دەيدى تۋىسى ايىم جيىنبەك.
سونداي-اق مارقۇمنىڭ تۋىستارى تەرگەۋدىڭ ءادىل ءوتىپ جاتقانىنا كۇمانمەن قارايدى. ولاردىڭ سوزىنشە، باستاپقى ىستە تىركەلگەن جاتاقحاناداعى بەينەجازبا بۇگىندە جوق. قىزدىڭ تەلەفونىنداعى حاتتار وشىرىلگەن. زارينا بەرىكوۆانىڭ تۋىستارى قايتا مەديتسينالىق ساراپتاما تاعايىنداپ، سول كۇنى قىزدىڭ جانىندا بولعان ادامداردى تەرگەۋدى سۇرايدى.
