تالدىقورعاندا ىشەك ينفەكسياسىن جۇقتىرعاندار سانى ءوستى
تالدىقورعان. KAZINFORM - تالدىقورعان قالاسى بويىنشا بيىل 10 ايدا ءجىتى ىشەك ينفەكسياسىنىڭ 881 جاعدايى انىقتالدى. بۇل وتكەن جىلدىڭ وسى ۋاقىتىمەن سالىستىرعاندا 17 جاعدايعا كوپ.
ءجىتى ىشەك ينفەكسياسى - بۇل اسقازان- ىشەك جولدارىن زاقىمدايتىن، ءار ءتۇرلى پاتوگەندى ميكروورگانيزمدەردەن تۋىندايتىن جۇقپالى اۋرۋلار توبى.
تالدىقورعان قالالىق سانيتاريالىق- ەپيدەميولوگيالىق باقىلاۋ باسقارماسىنىڭ دەرەگىنشە انىقتالعان 881 جاعدايدان ناقتىلانعانى - 589 جاعداي (1 سالمونەللەز)، ناقتىلانباعان ءجىتى ىشەك جۇقپاسى- 292. ءبىر قۋانارلىعى 14 جاسقا دەيىنگى بالالار اراسىندا اۋرۋ كورسەتكىشى تومەندەگەن. بىلتىر 10 ايدىڭ ىشىندە 569 جاعداي تىركەلسە، بيىل 507 جاسوسپىرىمنەن انىقتالعان.
«ينفەكسيانىڭ تارالۋ جولى %100 جاعدايدا تاعام ارقىلى بولادى. بەرىلۋ فاكتورلارى ءۇي جاعدايىندا دايىندالعان، دۇرىس ساقتالماعان تاعامدار ونىمدەرى، كوشەدەگى ستيحيالىق ساۋدا، سونىمەن قاتار رۇقساتى جوق تاماقتانۋ» - دەدى تالدىقورعان قالالىق سانيتاريالىق- ەپيدەميولوگيالىق باقىلاۋ باسقارماسى باسشى ساۋلە احان.
