تالدىقورعاندا ناشار كورەتىن ادامدارعا جولدى كەسىپ وتۋگە ارنالعان جاڭا قۇرىلعى ويلاپ تابىلدى
تالدىقورعان. KAZINFORM - نازاربايەۆ زياتكەرلىك مەكتەبىنىڭ وقۋشىسى انار نۇرماحان باعدارشام سيگنالدارىن داۋىسپەن سۇيەمەلدەۋدىڭ بىرەگەي جۇيەسىن جاسادى. قۇرىلعىنى ءوڭىردىڭ ب ا ق وكىلدەرىنە وڭىرلىك كوممۋنيكاتسيالار قىزمەتىنىڭ اقپاراتتىق الاڭىندا تانىستىرىلدى.
شاھاردا 1973 تەن استام كورۋ قابىلەتى ناشار ادامدار بار. 200 باعدارشامنىڭ كەيبىرى عانا وسىنداي قۇرىلعىلارمەن جابدىقتالعان. سوندىقتان، «It Servise education» جاستار قوعامدىق بىرلەستىگى مەن نازاربايەۆ زياتكەرلىك مەكتەبى 2023 -جىلدان باستاپ ناشار كورەتىن ادامدارعا كومەكتەسەتىن قۇرىلعى جاساۋعا باعىتتالعان جاڭا جوبانى باستاعان. بۇگىندە قۇرىلعى ءتورت ماۋسىمدىق تەستىلەۋدەن وتۋدە.
«قۇرىلعى قۋاتتى ديناميكپەن جابدىقتالعان جانە دىبىستىق حابارلامالاردى مەملەكەتتىك تىلدە تاراتادى. ول ءسىز كەسىپ وتپەكشى نەگىزگى كوشەنىڭ اتىن حابارلايدى جانە باعدارشامنىڭ جاسىل جانعانشا ۋاقىتىن سانايدى. بۇل ناشار كورەتىن ادامدارعا جاياۋ جۇرگىنشىلەر وتكەلدەرىن وڭاي تابۋعا، كوشە اتاۋلارىن بىلۋگە جانە قيىلىستاردى قاۋىپسىز كەسىپ وتۋگە مۇمكىندىك بەرەدى. سونىمەن قاتار، قۇرىلعى تۇندە دىبىس دەڭگەيىن %50 اۆتوماتتى تۇردە رەتتەيدى» - دەپ، ءتۇسىندىردى جوبا ازىرلەۋشىسى انار نۇرماحان.
