تالدىقورعاندا شەرزات ىسىنە بايلانىستى سوت باستالدى
تالدىقورعان. KAZINFORM - جەتىسۋ وبلىسىندا شەرزات پولاتتىڭ ولىمىنە بايلانىستى سوت وتىرىسى باستالدى.
سوت تالدىقورعان قالاسىنداعى جەتىسۋ وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىنىڭ عيماراتىندا ءوتىپ جاتىر. سۋديا - ەرجان جانۇزاقوۆ. سوت زالىندا شەرزات پولاتتىڭ وتباسى دا بار.
ەسكە سالايىق، بيىل اقپان ايىندا شەرزات ىسىنە قاتىستى قىلمىستى تەرگەۋ اياقتالدى. قىلمىستىق ءىس 62 تومنان تۇرادى. تەرگەۋ بارىسىندا 40 سوت ساراپتاماسى جۇرگىزىلىپ، شامامەن 200 كۋاگەردەن جاۋاپ الىنعان.
ەسكە سالايىق، بىلتىر 4-قازان كۇنى توبەلەستەن 16 جاستاعى جاس ءوسپىرىم قايتىس بولعانىن جازعانبىز.
كەيىن اشۋلى تالعارلىقتار جاس ءوسپىرىم ولىمىنە بايلانىستى نارازىلىققا شىقتى.
2024 -جىلدىڭ 12-قازانىندا قارا جامىلعان وتباسىنىڭ ءۇيى ورتەنىپ كەتتى. الماتى وبلىسىنىڭ پوليتسيا دەپارتامەنتى بوتەننىڭ مۇلكىن قاساقانا جويۋ فاكتىسى بويىنشا ءىس قوزعادى.
15-قازان كۇنى تالعار قالاسىنىڭ اكىمى باحىت قۋاتبەك ۇلى كۇرىشبەكوۆ، تالعار قالاسى اكىمىنىڭ ورىنباسارى ماتان ساعىندىق ءوز مىندەتتەرىن ءتيىستى دەڭگەيدە اتقارماعانى ءۇشىن لاۋازىمدارىنان بوساتىلدى. ارتىنشا، تالعار اۋدانى اكىمى اپپاراتىنىڭ باسشىسى اسلان قاسىمبايەۆ قىزمەتىنەن قۋىلدى.
2024 -جىلدىڭ جەلتوقسان ايىندا تالعار ماڭىندا شەرزات پولاتتىڭ اعاسى ءولى تابىلدى.
باس پروكۋروردىڭ ورىنباسارى عالىمجان قويگەلديەۆ شەرزات پولاتتىڭ ءۇيىنىڭ ورتەنۋىنە قاتىستى تەرگەۋدىڭ جاڭا مالىمەتتەرىن ايتتى.
اۆتور
دوسبول اتاجان
