تالدىقورعان- وسكەمەن ترانزيتتىك ءدالىزىنىڭ ءبىرىنشى ۋچاسكەسىندە جاڭا ءتورت جولاقتى جول اشىلدى

استانا. KAZINFORM - «تالدىقورعان- وسكەمەن» حالىقارالىق ترانزيتتىك ءدالىزىنىڭ ءبىرىنشى ۋچاسكەسىندە اشىلعان جاڭا ءتورت جولاقتى جول ەلىمىزدىڭ ترانسپورتتىق ينفراقۇرىلىمى ءۇشىن ماڭىزدى شارالاردىڭ ءبىرى.

«قازاۆتوجول» ۇلتتىق كومپانياسى «تالدىقورعان - وسكەمەن» اۆتوجولىنىڭ قايتا جاڭارتۋ جۇمىستارىن جالعاستىرۋدا. ول «الماتى - تالدىقورعان - وسكەمەن - شەمونايحا - ر ف شەكاراسى، بارناۋلعا قاراي» حالىقارالىق ترانزيتتىك ءدالىزىنىڭ بولىگى، ۇزىندىعى 1210 شاقىرىمدى قۇرايدى.

بۇگىن تالدىقورعان قالاسىن قىزىلاعاش اۋىلىمەن بايلانىستىراتىن ۇزىندىعى 38 شاقىرىم قۇرايتىن جاڭا ءتورت جولاقتى جول اشىلدى. ونىڭ 32 شاقىرىمى ءبىرىنشى تەحنيكالىق ساناتقا جاتادى. بۇل ترانزيتتىك ءدالىز ورتالىق ازيا مەن قىتايدى رەسەيدىڭ شىعىس ايماقتارىمەن جانە قيىر شىعىسپەن بايلانىستىرىپ، ساۋدا- ەكونوميكالىق قاتىناستارعا جاڭا مۇمكىندىكتەردى اشادى.

«ۇزىندىعى 768 شاقىرىم بولاتىن «تالدىقورعان - وسكەمەن» اۆتوجولىنىڭ قايتا جاڭارتۋ جۇمىستارى قارقىندى ءجۇرىپ جاتىر، ونىڭ 314 شاقىرىمى جەتىسۋ وبلىسى ارقىلى وتەدى. وبلىستا جول جابىنىنىڭ تومەنگى قاباتىن توسەۋ جۇمىستارى اياقتالىپ، ۇستىڭگى قاباتىن قيىرشىق تاس- ماستيكالىق اسفالت بەتونمەن توسەۋ جۇمىستارى جالعاسۋدا. قازىرگى تاڭدا 300 شاقىرىم جول توسەلدى، بۇل جوسپارلانعان كولەمنىڭ 96 پايىزىن قۇرايدى»، - دەپ جازدى قازاۆتوجولدان.

جوبا جۇمىستارىنا 5 اسفالت بەتون زاۋىتى، 490 بىرلىك جول-قۇرىلىس تەحنيكاسى مەن 600 دەن اسا مامان جۇمىلدىرىلعان. 79 جاساندى نىسان سالۋ جوسپارلانۋدا، ونىڭ ىشىندە 22 كوپىر، 54 مالوتەكەل مەن 3 ترانسپورتتىق جول ايرىعى، سونداي-اق كارىز جۇيەسى ءۇشىن 323 سۋوتكىزگىش قۇبىرلار.

جول پايدالانۋشىلاردىڭ قولايلى قوزعالىسى ءۇشىن 12 دەمالىس ورىن مەن 10 زاماناۋي سانيتارلىق- گيگيەنالىق توراپ سالۋ جوسپارلانعان، ونىڭ تورتەۋى قولدانىسقا بەرىلدى.

جولدىڭ قالعان ۋچاسكەلەرى كەزەڭ-كەزەڭمەن جىلدىڭ سوڭىنا دەيىن اياقتالىپ، جۇك تاسىمالى مەن جولاۋشىلار ءۇشىن قاۋىپسىز ءارى قولايلى قوزعالىستى قامتاماسىز ەتەتىن بولادى.

اۆتور
اسحات رايقۇل