تالدىقورعان قالالىق پوليتسيا باسقارماسىنا جاڭا باسشى تاعايىندالدى
ىشكى ىستەر مينيسترلىگىنىڭ بۇيرىعىمەن تالدىقورعان قالاسىنىڭ پوليتسيا باسقارماسىن ەرنار شىربايەۆ باسقارادى.
kazinform بۇل تۋرالى جەتىسۋ وبلىستىق پوليتسيا دەپارتامەنتىنە سىلتەمە جاساپ حابارلايدى.
ەرنار مىرزاحمەت ۇلى شيربايەۆ «پوليتسيا پودپولكوۆنيگى» ارنايى اتاعىنا يە. جەدەل-تەرگەۋ بولىمشەلەرىندە جۇمىس ىستەدى. ىشكى ىستەر ورگاندارىنداعى قىزمەتىن تالدىقورعان قالالىق ىشكى ىستەر باسقارماسىنىڭ جەدەل ۋاكىلى قىزمەتىنەن باستاعان.
2011-2022-جىلدارى جەتىسۋ وبلىسىنىڭ قاراتال، پانفيلوۆ، اقسۋ، ەسكەلدى، الاكول اۋداندارى مەن الماتى وبلىسى قاراساي اۋدانىنىڭ ىشكى ىستەر بولىمدەرىندە باسشىلىق قۇرامدا ەڭبەك ەتتى.
2022-جىلدىڭ شىلدە ايىنان وسى ۋاقىتقا دەيىن اقسۋ اۋداندىق پوليتسيا ءبولىمىنىڭ باستىعى بولدى.
ەسكە سالايىق، تالدىقورعان قالالىق پوليتسيا باسقارماسىنىڭ وسىعان دەيىنگى باستىعى مارات كۇشتىبايەۆ 15- قاراشادا قىز زورلادى دەگەن كۇدىكپەن ەكى اي مەرزىمگە قاماۋعا الىنعانى حابارلاندى.
وسى كۇنى ىشكى ىستەر ءمينيسترى جەتىسۋ وبلىسى پوليتسيا دەپارتامەنتىنىڭ باستىعى اتىعاي ارىستانوۆتى قىزمەتىنەن بوساتتى. سونداي-اق دەپارتامەنت باستىعىنىڭ كادر ساياساتى جونىندەگى ورىنباسارى تالانت جۇمابەك پەن تەرگەۋ بويىنشا ورىنباسارى ماقسات ەرەجەپوۆ تە جۇمىستان كەتتى.
جەتىسۋ وبلىسى پ د باستىعىنىڭ مىندەتىن پوليتسيا گەنەرال-مايورى ارمان سادانوۆ اتقارادى. بۇعان دەيىن ول ءىءى م وزىندىك قاۋىپسىزدىك دەپارتامەنتىن باسقارعان.
