تالدىقورعان ماڭىندا كونە پەتروگليفتەر جويىلۋ الدىندا تۇر - دەپۋتات

استانا. KAZINFORM - ءماجىلىس دەپۋتاتى سەرگەي پونوماريەۆ تالدىقورعان ماڭىنداعى بۇزاقىلىق ماسەلەسىن كوتەردى.

- مەن تاعى دا ۆانداليزم ماسەلەسىن قوزعاعىم كەلەدى. قوعام ءبىزدى قورشاعان دۇنيەلەردىڭ بۇلىنۋىنە الاڭداۋلى. جاستار ورىندىقتاردى سىندىرىپ، قوقىس جاشىكتەرىن قيراتىپ، عيماراتتاردىڭ قاسبەتتەرىن عانا ەمەس، ءتىپتى ەسكەرتكىشتەرگە دە ادەپسىز سوزدەر جازىپ كەتەتىن بولدى. بۇل جاستار نەگە ەشتەڭەنىڭ قادىرىن تۇسىنبەيدى؟ اسىرەسە، ويىن الاڭدارىنداعى اتكەنشەكتەردى اۋدارۋ، سپورت الاڭدارىنداعى باسكەتبول سەبەتىن سىندىرۋ ادەتكە اينالىپ بارادى. ۆانداليزم قوعامدىق قۇندىلىقتاردى جويادى، - دەدى پالاتانىڭ جالپى وتىرىسىندا دەپۋتاتتىق ساۋال جولداعان سەرگەي پوناماريەۆ.

ماجىلىسمەن جالپىۇلتتىق قۇرىلتايدا قاسىم-جومارت توقايەۆ بۇل ماسەلەنى وتكىر ايتقانىن اتاپ ءوتتى. «بۋرابايداعى جۇمباقتاسقا، باياناۋىلداعى كەمپىرتاسقا قاراڭىزشى، قايتالانباس سۇلۋلىق ءتۇرلى جازۋلاردىڭ كولەڭكەسىندە قالىپ قويعان. تۇرعىن ۇيلەردەگى ليفتتەردى، اۋلالارداعى ويىن الاڭدارىن، كوشەلەردەگى ايالدامالاردى ءبۇلدىرۋدىڭ قانداي قاجەتى بار؟! مۇنىڭ ءبارى ادەپسىزدىك پەن مادەنيەتسىزدىكتى كورسەتەدى» دەگەن ەدى مەملەكەت باسشىسى.

ول سونداي-اق، اركىم وزىنەن باستاۋى كەرەكتىگىن ايتتى. جاستار ۇلكەندەردەن ۇلگى الادى.

قالالارداعى ۆانداليزم فاكتىلەرىن پوليتسيا مەن جۇرتشىلىق نازارىنا ىلىكتىرۋ ءۇشىن الەۋمەتتىك جەلىدە جاريالاۋ - بۇگىندە قۋاتتى قۇرال.

- قازىر مەن ءوز دەپۋتاتتىق ساۋالىمدى جولداپ جاتىرمىن، ال جەتىسۋ اۋماعىندا تالدىقورعان قالاسىنىڭ ماڭىنداعى ەجەلگى پەتروگليفتەرى بار قورعاندار قۇرىلىس تاسى ءۇشىن قاساقانا جويىلۋدا. «ەنەرگوستروي» كومپانياسى تۇرعىندارعا «تەمىر» كارەرىندەگى تاۋ جىنىستارىن قوپسىتۋ ءۇشىن جارىلىس جۇمىستارى جۇرگىزىلەتىنىن ەسكەرتتى. ولار تالدىقورعان قالاسىنىڭ تۇرعىندارى مەن قوناقتارىنان ۇرەيلەنۋگە سەبەپ جوق ەكەنىن تۇسىندىرگەن. دەپۋتاتتىق ساۋالىمىزعا «ۆانداليزمنىڭ الدىن الۋ ماقساتىندا جىل سايىن 10 مىڭعا جۋىق ءىس-شارا وتكىزىلەدى» دەگەن قارابايىر جاۋاپ الدىق. ءبىز التىن وندىرۋشىلەردىڭ ويلانباي جاساعان امالىنان عاسىرلار بويعى قۇندى دەرەكتەر جويىلىپ كەتۋى مۇمكىن ەكەنىن جازعانىمىزبەن، پەتروگليفتەردى جويۋشىلار مەن مەتالل ىزدەگىشتەر تۋرالى ءبىر اۋىز ءسوز ايتىلمادى، - دەدى سەرگەي پوناماريەۆ.

جوعارىدا ايتىلعانداردى ەسكەرە وتىرىپ دەپۋتات ۇسىنىس جاسادى.

ۇكىمەت تاريحي جانە مادەني نىسانداردى ساقتاۋ تۋرالى زاڭنامانىڭ ورىندالۋىن ەرەكشە باقىلاۋعا الىپ، مادەني مۇرانى زەرتتەۋ، رەستاۆراتسيالاۋ جانە قورعاۋ ورتالىقتارى ينسپەكتورلارىنىڭ وكىلەتتىگىن زاڭنامالىق تۇرعىدان كەڭەيتۋى قاجەت.

الەۋمەتتىك جەلىلەردە ۆانداليزمگە قارسى اقپاراتتىق-ءتۇسىندىرۋ جۇمىستارىن كۇشەيتۋ ماڭىزدى.

ىشكى ىستەر مينيسترلىگى اكىمدىكتەرمەن بىرلەسىپ، جوسپارلانعان 28 مىڭ بەينەباقىلاۋ كامەراسىن، ونىڭ ىشىندە قازاقستاننىڭ تاريحي-مادەني جانە تابيعي مۇرا نىساندارىنا دا ورناتۋى ءتيىس.

اۋەسقوي ارحەولوگتارعا مەتال ىزدەگىشتەرگە تىيىم سالۋ، قىزمەتتىڭ وسى تۇرىنە ليتسەنزيالاۋدى ەنگىزۋ، تاريحي-مادەني مۇرا ەسكەرتكىشتەرىن جويۋ ءۇشىن جاۋاپكەرشىلىكتى كۇشەيتۋ قاجەت.

اۆتور

ەركەجان سماعۇلوۆا