تالعار قالاسىنىڭ اكىمى لاۋازىمىنا ۇمىتكەرلەر بەلگىلى بولدى

قونايەۆ. KAZINFORM - اۋماقتىق سايلاۋ كوميسسياسى تالعار اكىمى بولۋعا تىركەلگەن كانديداتتار ءتىزىمىن جاريالادى.

تىزىمدە ءۇش ادام بار.

«تالعار تۇرعىن ءۇي» ج ش س- ءنىڭ باسشىسى، 1983-جىلى تۋعان ارىستانبەك ابيحاير ۇلى «Amanat» پارتياسى اتىنان ۇسىنىلىپ وتىر.

ەكىنشى كانديدات - جانىبەك كادەنوۆ. 1991-جىلى تۋعان. ول «تالعار اۋدانى اكىمىنىڭ اپپاراتى» م م- ءنىڭ قارجى-شارۋاشىلىق بولىمىندە باس مامان بولىپ جۇمىس ىستەيدى. ونى قازاقستان حالىقتىق پارتياسى ۇسىنعان.

سوڭعى ۇمىتكەر - الىبەك رامازانوۆ. ول ءوزىن-ءوزى ۇسىنعان. ول بەساعاش اۋىلدىق وكرۋگىنىڭ اپپارات مەملەكەتتىك مەكەمەسىندە اكىمنىڭ ورىنباسارى بولىپ قىزمەت ەتەدى.

بۇعان دەيىن تالعار اۋدانىنىڭ اۋماقتىق سايلاۋ كوميسسياسى قالا اكىمىنىڭ سايلاۋ كۇنىن 15-جەلتوقسانعا بەلگىلەگەنى تۋرالى جازعان ەدىك.

وسىعان دەيىن تالعار قالاسىنىڭ اكىمى باحىت قۋاتبەك ۇلى كۇرىشبەكوۆ، تالعار قالاسى اكىمىنىڭ ورىنباسارى ماتان ساعىندىق ءوز مىندەتتەرىن ءتيىستى دەڭگەيدە اتقارماعانى ءۇشىن لاۋازىمدارىنان بوساتىلعان بولاتىن.

15-قاراشا كۇنى تالعار اۋدانى اكىمى اپپاراتىنىڭ باسشىسى لاۋازىمىنا نۇرجان ابداليموۆ تاعايىندالدى.