تالعار اۋدانىنداعى مادەنيەت سارايىندا وقۋشىلار اراسىندا ولەڭ وقۋدان جارىس ءوتتى
استانا. قازاقپارات - 19-قازان كۇنى تالعار اۋدانىنا قاراستى تۇزدىباستاۋ مادەنيەت سارايىندا اقىن، جازۋشى، سىنشى، جۋرناليست بولات قۇرمانعاجى ۇلى اكەجاننىڭ ولەڭدەرىن جاتقا مانەرلەپ وقۋدان تۇزدىباستاۋداعى №31 جانە №13-مەكتەپ وقۋشىلارىنان ۇيىمداستىرىلعان جارىس ءوتتى.
اتالعان ءىس-شارانى ۇيىمداستىرۋشى ءانشى، تۇزدىباستاۋ مادەنيەت ءۇيىنىڭ باسشىسى مۇراتبەك سارباسوۆ. كوكسۋ اۋدانىنان مەنى باعالاۋشى بولۋعا ارنايى شاقىرىپتى. مۇراتبەك اعامىز، گاۋھار ەسىمدى كومەكشى قىز بار، بۇل جولعى جارىستى جاقسى ۇيىمداستىرىپتى. ەكى مەكتەپتەگى مۇعالىمدەر وقۋشىلارىنا بولات قۇرمانعاجى ۇلى اكەجاننىڭ ولەڭدەرىن جاتتاتىپ، دايىنداپ الىپ كەلىپتى.
جۇرگىزۋشىنىڭ حابارلاۋىمەن كەزەك-كەزەك ساحناعا شىعىپ ولەڭ وقىعان ۇل-قىزداردىڭ ونەرىنە بولات قۇرمانعاجى اعا ەكەۋىمىز باعا بەردىك. مانەرلەپ وقۋ بارىسىندا نەگىزىنەن ولەڭدى جاندىرىپ، جالىنداتىپ وقىعاندار كوپ بولدى. اركىمنىڭ ونەرىنە قاراي ءتيىستى باعاسىن بەردىك. بۇل جولعى ولەڭ وقۋ بايگەسىنە قىرىقتان استام بالا قاتىسقاندىقتان «كىل جۇيىرىكتەن شىن جۇيىرىكتى» انىقتاۋ ارينە بىزگە وڭايعا سوقپادى.
ءار قاتىسۋشىعا ارناپ بەلگىلەگەن نومىرگە، جازعان ەسكەرتپە، پىكىرلەرىمىزگە قاراپ وتىرىپ ۇزدىكتەردى، ءبىرىنشى، ەكىنشى، ءۇشىنشى دارەجەلىلەردى تاڭداپ شىقتىق.
سونداي-اق، قاتىسقان وقۋشىلار دا سىيلىقسىز، ماراپاتسىز قالعان جوق... ساحنا سىرتىنداعى 10-20 مينۋتتىق ۇزىلىستەن كەيىنگى، جۇرگىزۋشى قىزدىڭ جاريالاۋىمەن ساحنا تورىنە بولات اعا ەكەۋىمىز كوتەرىلىپ، بالالار ولەڭ وقۋىنا باعامىزدى، كوزقاراسىمىزدى ايتتىق. ءسوز رەتىنە قاراي مۇراتبەك سارباسوۆ، گاۋھار قىزعا، ونەرلى شاكىرت تاربيەلەپ، ەڭبەكتەنىپ، وقۋشىلارىن باپتاپ جارىسقا اكەلىپ قاتىستىرعان ۇستازدارعا العىس بىلدىردىك.
جالپى، جاس جەتكىنشەكتەر - ءبىزدىڭ بولاشاعىمىز عوي. بالالار اقىن ولەڭىن جاتتاپ، قازاق ءسوزىنىڭ مايەگىنەن ءنار الىپ، سۋسىنداپ وسسە، جامان بولماس دەگەن ويدامىن...
ارى قاراي بالالارعا سيلىق تاراتۋ ءراسىمى باستالدى. كەلىپ قاتىسقان قىرىق شاقتى بالادان ەشكىم قالماي ساحنا تورىنە شىعىپ سىيلىق الدى. مۇنداي ماراپات، العىس حاتتان ۇستازدار قاۋىمى دا كەندە قالمادى.
بارلىق ماراپات تاراتىلىپ بولعاننان كەيىن بالالارمەن بىرگە ەستەلىك سۋرەتكە تۇستىك.
بارىنەن دە قۋانتقانى شاعىن بولسا دا وسىنداي ءبىر ءدۇبىرلى كەشتىڭ ءوتۋى، وعان مەكتەپ وقۋشىلارىنىڭ قاتىسۋى بولدى. وسىلاي دا كەش وتكىزىپ، ونەردى، ولەڭدى دارىپتەۋگە بولادى ەكەن-اۋ دەگەن وي كەلدى. مۇنىڭ ءبارى ءوزى ونەرلى، اڭعارلى مۇراتبەك سارباسوۆتىڭ ەڭبەگى ەكەنى حاق. جوقتان بار جاساپ، ويلاماعان جەردەن ونەر بايگەسىن ۇيىمداستىرۋ وسىنداي ىسكەر ازاماتتاردىڭ قولىنان كەلسە كەرەك. (وسى وتكەن شارانى ەستىپ، ءبىلىپ وتىرعان، مۇمكىندىگى بار بارلىق مادەنيەت سالاسىن باسقارىپ وتىرعانداردىڭ قۇلاعىنا التىن سىرعا!)
سارباسوۆ اعامىزدىڭ ايتۋىنشا، بۇل ۇردىس جىل سايىن وتكىزىلىپ، جالعاسىن تاپپاق ەكەن. ءبىز قۋانىپ ساتتىلىك تىلەدىك.
جارىس سوڭىندا مۇعالىمدەر، وقۋشىلار اقىن، جازۋشى، سىنشى، جۋرناليست بولات قۇرمانعاجى ۇلىمەن سۋرەتكە تۇسىپ، اۆتوردىڭ كىتاپتارىنان جەتكەنىنشە الىپ تاراستى…. مەن ولەڭ جىر ەستىپ، ۇل-قىزدارىمىزدىڭ ونەرىنە كۋا بولىپ، رۋحاني ءلاززات الىپ، ءبىر سەرپىلىپ قالدىم.
ءسوز سوڭىندا بولات قۇرمانعاجى ۇلى اكەجان اعامىزعا شىعارماشىلىق تابىس، تۇزدىباستاۋ مادەنيەت ءۇيى ۇجىمىنىڭ جۇمىسىنا بەرەكە، تابىس تىلەيمىن!
اۆتورى: جەڭىس قانەن
