تالاپكەرلەر گرانتىنىڭ ءتىزىمى بۇگىن جاريالانادى

استانا. KAZINFORM - مەملەكەتتىك ءبىلىم بەرۋ گرانتتارىن تاعايىنداۋ جونىندەگى رەسپۋبليكالىق كوميسسيا ءوز جۇمىسىن اياقتادى. گرانت يەگەرلەرىنىڭ ءتىزىمى 3-تامىزدا جاريالانادى. بۇل تۋرالى عىلىم جانە جوعارى ءبىلىم ءمينيسترى ساياسات نۇربەك ءمالىم ەتتى.

كوميسسيا قۇرامىندا ق ر پارلامەنتىنىڭ دەپۋتاتتارى، مەملەكەتتىك ورگاندار، ءبىلىم سالاسى كاسىپوداقتارىنىڭ، «اتامەكەن» ۇلتتىق كاسىپكەرلەر پالاتاسىنىڭ، جوعارعى وقۋ ورىندارى قاۋىمداستىعىنىڭ، قوعامدىق ۇيىمداردىڭ وكىلدەرى بولدى.

«ءارى قاراي تالاپكەرلەردىڭ ۇ ب ت-دا جيناعان بالدارىنا جانە بەكىتىلگەن ەرەجەلەرگە سايكەس كونكۋرستىق نەگىزدە ءبىلىم بەرۋ گرانتتارى تاعايىندالاتىن بولادى. تالاپكەرلەردىڭ باسىم بولىگىنىڭ تاڭداۋى «پەداگوگيكالىق عىلىمدار»، «ينجەنەرلىك، وڭدەۋ جانە قۇرىلىس سالالارى» جانە «اقپاراتتىق- كوممۋنيكاتسيالىق تەحنولوگيالار» باعىتتارىنداعى ماماندىقتارعا ءتۇستى»، - دەپ جازدى مينيستر ءوزىنىڭ Telegram پاراقشاسىندا.

كونكۋرستىق ىرىكتەۋدىڭ قورىتىندىسى ق ر عىلىم جانە جوعارى ءبىلىم مينيسترلىگىنىڭ رەسمي سايتىندا جانە Telegram ارناسىندا 3-تامىز كۇنى ساعات 11.00-دە جاريالانادى. سونداي-اق ۇلتتىق تەستىلەۋ ورتالىعىنىڭ Telegram ارناسى مەن ستۋدەنتتەرگە ارنالعان اقپاراتتىق انىقتامالىق پورتال mapp.kz سايتىندا ورنالاستىرىلادى.

جوعارى وقۋ ورىندارىنا قۇجاتتاردى قابىلداۋ 25-تامىزدا اياقتالادى.

اۆتور
ايجان سەرىكجان قىزى