تاكسيستەرگە سالىناتىن سالىق: ەندى نە وزگەرەدى؟

استانا. KAZINFORM - ۇلتتىق ەكونوميكا مينيسترلىگى «سالىق رەفورماسىنىڭ تەرىس اسەرى بولا ما؟» دەگەن ساۋالمەن جۇگىنگەن تاكسوپاركتەردىڭ مالىمدەمەسىنە جاۋاپ بەردى.

مينيسترلىك مالىمەتىنشە، 20-اقپاندا ماجىلىسكە قاراۋعا ۇسىنىلعان سالىق كودەكسى جوباسىندا تاكسي جۇرگىزۋشىلەرى ءۇشىن جەڭىلدەتىلگەن سالىق رەجيمى قاراستىرىلعان.

«ق ق س جانە باسقا دا سالىقتار سالىنبايدى، جەكە تابىس سالىعىنىڭ مولشەرلەمەسى نولگە تەڭ. تاكسي جۇرگىزۋشىلەرى تەك %4 مولشەرىندەگى ءبىرىڭعاي تولەمدى تولەيدى، وعان زەينەتاقى جارنالارى، الەۋمەتتىك اۋدارىمدار جانە مەديتسينالىق ساقتاندىرۋ كىرەدى. بۇل رەجيمدى جەكە كاسىپكەر رەتىندە تىركەلمەي-اق پايدالانۋعا بولادى. وسىلايشا تاكسي جۇرگىزۋشىلەرى ءۇشىن سالىق جۇكتەمەسى تۇسپەيدى»، - دەپ جازىلعان حابارلامادا.

بۇعان قوسا ەندى تاكسي جۇرگىزۋشىلەرى ينتەرنەت پلاتفورما وپەراتورىمەن (ياندەكس جانە ت. ب.) تاكسي پاركتەرىنىڭ قاتىسۋىنسىز، تىكەلەي جۇمىس ىستەي الادى.

مەملەكەتتىك كىرىستەر كوميتەتىنىڭ مالىمەتىنشە، 2024-جىلدىڭ قورىتىندىسى نەگىزىندە تاكسي قىزمەتىنىڭ ءتۇرى، ونىڭ ىشىندە جالعا بەرۋ بويىنشا 15 مىڭعا جۋىق سالىق تولەۋشى جەڭىلدەتىلگەن دەكلاراتسيا رەجيمىن قولداناتىنى بەلگىلى بولعان. ونىڭ ىشىندە تەك 924 سالىق تولەۋشى 15 ميلليون تەڭگە شەكتى سومادان اسادى.

«ق ق س تولەۋ مىندەتتەمەسى مەن شەكتى سوما تومەندەۋى تەك %6 ىنا اسەر ەتەدى. بۇل – ق ق س تولەۋگە مىندەتتى ءىرى تاكسوپاركتەر»، - دەپ جازىلعان حابارلامادا.

ۆەدومستۆو مالىمەتىنشە، ينتەرنەت پلاتفورما وپەراتورى ق ق س تولەيدى.

مينيسترلىك باعا نارىققا، باسەكەلەستىككە، سۇرانىس پەن ۇسىنىسقا بايلانىستى دا قويىلاتىنىن مالىمدەدى.

ەسكە سالايىق، ۇكىمەتتىڭ كەڭەيتىلگەن وتىرىسىندا پرەمەر-مينيستر ولجاس بەكتەنوۆ قازاقستاندا ق ق س مولشەرلەمەسىن ارتتىرۋ قاجەت ەكەنىن مالىمدەدى. مەملەكەت باسشىسى رەفورمالار تۋرالى شەشىمدى قولدادى.

كەيىنىرەك مەملەكەت باسشىسى وتاندىق بيزنەس وكىلدەرىمەن كەزدەسۋدە ۇكىمەتكە قوسىمشا قۇن سالىعى ماسەلەسىن تاعى دا پىسىقتاۋدى تاپسىردى.

ال ۇلتتىق ەكونوميكا مينيسترلىگى وكىلى ازامات ءامرين سالىق رەفورماسى شەڭبەرىندە ققس سارالانعان مولشەرلەمەلەرىن بەلگىلەۋ جونىندەگى ۇكىمەتتىڭ ۇسىنىسىن ايتتى:

«ءبىز مىناداي تەتىكتى قاراستىرۋدى ۇسىنامىز: جالپى بەلگىلەنگەن ققس مولشەرلەمەسى – 16 پايىز، اۋىل شارۋاشىلىعى ونىمدەرىن وندىرۋشىلەردى ق ق س- تان تولىق بوساتۋ، ال كەيبىر سالالار ءۇشىن %10 مولشەرىندەگى ارالىق مولشەرلەمە. وسىلايشا ۇكىمەت ۇسىنىپ وتىرعان مولشەرلەمەلەر: %16، %10، %0 جانە بوساتۋ».