تاكسي قىزمەتىنىڭ نارىعىن مونوپوليادان قالاي قورعاۋعا بولادى
استانا. KAZINFORM - ەلىمىزدە تاكسي قىزمەتىندەگى كەيبىر مەملەكەتتىك فۋنكسيالاردى ءوزىن-ءوزى رەتتەۋگە بەرۋ ماسەلەسى بىرنەشە جىلدان بەرى تالقىلانىپ كەلەدى.
جاڭا زاڭ جوباسىنا سايكەس تۇراقتى حالىقارالىق جانە وبلىسارالىق اۆتوبۋس تاسىمالدارى مەن تۇراقتى ەمەس اۆتوبۋس تاسىمالدارى، ساپارجاي قىزمەتتەرى جانە تاكسي قىزمەتىمەن بايلانىستى مەملەكەتتىك فۋنكتسيالاردى ارنايى پالاتا رەتتەپ وتىرۋى ءتيىس.
Jibek Joly ارناسىنىڭ «بۇگىن LIVE» باعادارلاماسىنا سۇحبات بەرگەن ق ر كولىك مينيسترلىگى اۆتوموبيل كولىگى جانە كولىكتىك باقىلاۋ كوميتەتىنىڭ باسقارما باسشىسى بۇل باستامانىڭ نەگىزگى ماقساتىن ءتۇسىندىردى.
- جولاۋشىلاردى اۆتوموبيل كولىگىمەن تاسىمالداۋ بويىنشا مەملەكەتتىك فۋنكتسيالاردى ءوزىن ءوزى رەتتەۋگە بەرۋ ماسەلەلەرى بويىنشا مينيسترلىك 2020-جىلدان بەرى جۇمىس جۇرگىزىپ كەلە جاتىر. نەگىزگى ماقساتى جولاۋشىلاردى اۆتوموبيلمەن تاسىمالداۋ نارىعىن وسى نارىق قاتىسۋشىلارىنىڭ وزدەرى ۇيىمداستىرىپ، رەتتەۋ. سونىمەن بىرگە وزىنە قاجەتتى قاعيدالار مەن ستاندارتتارىن جەدەل تۇردە قابىلداپ، ءتيىمدى ۇيىمداستىرۋ. ويتكەنى مەملەكەت كاسىپكەرلىككە قاتىسقاندا ونىڭ تەڭدىگى از، ال شىعىنى كوپ بولادى، - دەيدى جادىگەر تىلەكقابىل ۇلى.
مينيسترلىك وكىلى اتالعان زاڭ جوباسىنا سايكەس ارنايى پالاتا قۇرىلاتىنىن ايتتى. ال جولاۋشى تاسىمالداپ، قاراجات تاپقىسى كەلەتىندەر وسى ۇيىمعا كىرۋگە مىندەتتەلەدى.
- قولدانىستاعى ءوزىن- ءوزى رەتتەۋ تۋرالى زاڭعا سايكەس، بۇل زاڭ جوباسى اياسىندا بەرىلەتىن بارلىق فۋنكتسيالار مىندەتتى مۇشەلىكتى قامتيدى. ياعني، مىندەتتى مۇشەلىك قاراستىرىلعان جاعدايدا، وسى سالاداعى بارلىق كاسىپكەرلىك سۋبەكتىلەرى ءوزىن-ءوزى رەتتەۋ ۇيىمىنا كىرۋگە ءتيىس. ءوزىن ءوزى رەتتەۋ ۇيىمىنا كىرمەي قىزمەت كورسەتۋ زاڭسىز، - دەيدى ول.
ال ق ر پرالامەنتى ءماجىلىسىنىڭ دەپۋتاتى ەلنۇر بەيسەنوۆ مينيسترلىكتىڭ بۇل باستاماسىن تولىقتاي قولدامايتىنىن جەتكىزدى.
- بىزدە فراكسيانىڭ ارنايى وتىرىسى ءوتتى. وتىرىس بارىسىندا مينيسترلىك وزدەرىنىڭ كەيبىر پوزيتسيالارىن ءبىزدىڭ الدىمىزدا قورعاي المادى. ولاردىڭ ايتۋىنشا، ءوزىن-ءوزى رەتتەۋ ۇيىمىنا ياندەكس تاكسي، Aparu ،inDrive سەكىلدى كومپانيالاردىڭ باسىن بىرىكتىرەمىز، ەسەسىنە ولار قاۋىپسىزدىك شارالارىن كۇشەيتۋ كەرەك بولادى. سونىمەن قاتار وزدەرىنىڭ تاريفتەرىن وزدەرى رەتتەيدى. قازىر ياندەكس تاكسي مەن inDrive ەڭ ءىرى اگرەگاتتار. بىرىنشىدەن، ولارعا مۇنداي مۇمكىندىك بەرىلەتىن بولسا، ولار نارىقتى مونوپولياعا اينالدىرۋى مۇمكىن. باسقا ويىنشىلاردى كىرگىزبەۋ قاۋىپى بار. ەكىنشى قاۋىپ، زاڭ جوباسىنىڭ اياسىندا ءاربىر كولىك جۇرگىزۋشىگە اي سايىن 1000 تەڭگەدەن 3000 تەڭگەگە دەيىن جارنا تولەتۋى كەرەك. دەمەك، جۇرگىزۋشى جىلىنا 12 مىڭ تەڭگە جارنا تولەيدى. جالپى قازاقستاندا 600-700 مىڭ وتباسى ءناپاقاسىن وسى تاكسي قىزمەتى ارقىلى تاۋىپ وتىر. ولاردىڭ بارلىعىنان جارنا جينايتىن بولساق، ول شامامەن 6-9 ميلليارد تەڭگە قاراجات. ءبىزدىڭ ويىمىزشا بۇل قاراجات ءوزىن ءوزى رەتتەيتىن ۇيىمنىڭ قىزمەتكەرلەرىنە تولەنەتىن جالاقى مەن بونۋسقا عانا جەتەدى. بۇل اقشاعا ولار قاۋىپسىزدىكتى قامتاماسىز ەتە المايدى، - دەيدى دەپۋتات.
حالىق قالاۋلىسى بۇل ماسەلەنى شەشۋ ءۇشىن ءوزىنىڭ ۇسىنىستارىن ايتتى.
- جالپى مينيسترلىكتىڭ يدەياسى دۇرىس. باقىلاۋ مەن رەتتەۋ كەرەك. ءبىز ونىمەن كەلىسەمىز. سول ءۇشىن ءبىز وسى مۇمكىندىكتىڭ ءبارىن مينيسترلىكتىڭ وزىنە بەرۋدى ۇسىندىق. ورتادا دەلدالدىڭ قاجەتى جوق. كەز كەلگەن دەلدال ەرتەڭ باقىلاۋدان شىعۋى مۇمكىن. قاۋىپسىزدىكتى قامتاماسىز ەتۋ ءۇشىن ناقتى زاڭ نورمالارىن ەنگىزۋ كەرەك. ارنايى پالاتا بۇل فۋنكتسيانى اتقارا المايدى. بۇنداي تاجىريبە برازيليا، رەسەي سەكىلدى كوپ مەملەكەتتەردە بولعان. ولاردىڭ بارلىعى 3-4 جىل وسىنداي فورماتتا جۇمىس ىستەپ كوردى. ناتيجە بولماعان سوڭ قايتادان مەملەكەتتىك باقىلاۋعا اۋىستىردى، - دەيدى ەلنۇر بەيسەنوۆ.
دەپۋتات وتاندىق تاسىلماداۋ قىزمەتتەرىنىڭ نەگە از ەكەنىن دە ءتۇسىندىردى.
- نارىقتىڭ زاڭدىلىعى بار. باعا ارزان بولۋ ءۇشىن سۇرانىسقا ۇسىنىستى كوبەيتۋ كەرەك. بىزدە ازىرگە مونوپوليا بولىپ تۇر. ءبىز بۇل ماسەلەنى بىرنەشە رەت كوتەردىك. وسى اگرەگاتتارعا بالاما رەتىندە تاكسي قىزمەتىن جاسايىقشى دەپ ايتتىم. ءبىراق بۇل قىرۋار قاراجات تۇرادى. مۇنداي پلاتفورمالاردى ىسكە اسىرۋ ءۇشىن شامامەن 10 ميلليون ا ق ش دوللارى كەرەك ەكەن، - دەدى ول.
ەسكە سالا كەتەيىك، قىزىلوردادا ينۆاتاكسي قىزمەتىنە قاتىستى شاعىم كوپ.
ودان بولەك اتىراۋدا تاكسي جۇرگىزۋشىلەرىنىڭ كەسىرىنەن 3 جىلدا 31 ادام مەرت بولعان.
