تاكسي قۇنى ءۇش ەسەگە جۋىق ءوستى: باسەكەلەستىكتى قورعاۋ اگەنتتىگى inDrive سەرۆيسىنە ەسكەرتۋ جاسادى

بۇعان 2026-جىلعى 11-قازاندا «ياندەكس Go» سەرۆيسىنىڭ ۋاقىتشا قولجەتىمسىز بولۋىنا بايلانىستى جول ءجۇرۋ قۇنىنىڭ ەداۋىر وسكەنى تۋرالى بۇقارالىق اقپارات قۇرالدارىندا جاريالانعان حابارلامالار نەگىز بولدى.

پايدالانۋشىلاردىڭ تاكسي شاقىرۋعا ارنالعان بالاما پلاتفورمالارعا جاپپاي اۋىسۋى ناتيجەسىندە inDrive قىزمەتىنە سۇرانىس ايتارلىقتاي ارتتى. ب ا ق مالىمەتىنشە، جەكەلەگەن جاعدايلاردا ساپار قۇنى ءۇش ەسەگە جۋىق وسكەن.

- inDrive سەرۆيسىنىڭ جۇمىس ىستەۋ ەرەكشەلىگىن ەسكەرە وتىرىپ، ساپار قۇنى جولاۋشى مەن جۇرگىزۋشى اراسىنداعى كەلىسىم بويىنشا بەلگىلەنەدى. بوس اۆتوكولىكتەردىڭ تاپشىلىعى جۇرگىزۋشىلەر ۇسىناتىن تاريفتەردىڭ ەداۋىر وسۋىنە الىپ كەلدى.

inDrive كومپانياسىنىڭ ب ا ق-تا تاراتقان اقپاراتىنا سايكەس، جاعدايدى تۇراقتاندىرۋ ماقساتىندا سەرۆيس كوميسسيانى مىندەتتى سالىقتاردى جابۋعا جەتكىلىكتى ەڭ تومەنگى دەڭگەيگە دەيىن تومەندەتىپ، سونداي-اق باعا بويىنشا ساۋدالاسۋدىڭ شەكتى اۋقىمىنا قاتىستى شەكتەۋلەر ەنگىزگەن،- دەلىنگەن حابارلامادا.

سونىمەن قاتار اگەنتتىك قازاقستانداعى تاكسي اگرەگاتورلارى نارىعىنىڭ جوعارى شوعىرلانۋ دەڭگەيىمەن سيپاتتالاتىنىن اتاپ ءوتتى. مۇنداي جاعدايدا قىزمەتتەردىڭ قولجەتىمدىلىگىن قامتاماسىز ەتۋ جانە ساپار قۇنىنىڭ نەگىزسىز وسۋىنە جول بەرمەۋ تۇتىنۋشىلاردىڭ مۇددەلەرىن قورعاۋ ءۇشىن ەرەكشە ماڭىزعا يە.

حالىقارالىق تاجىريبەدە توتەنشە جاعدايلار مەن وزگە دە كۇتپەگەن ءمان-جايلار كەزىندە تاريفتەردىڭ كۇرت ءوسۋىن تەجەۋ تەتىكتەرى قولدانىلادى.

قازاقستان رەسپۋبليكاسى كاسىپكەرلىك كودەكسىنىڭ 174-بابىنا سايكەس، تۇتىنۋشىلاردىڭ ايقىندالماعان توبىنىڭ زاڭدى قۇقىقتارىنا نۇقسان كەلتىرەتىن نارىق سۋبەكتىلەرىنىڭ ارەكەتتەرىندە باسەكەلەستىكتى قورعاۋ سالاسىنداعى زاڭنامانى بۇزۋ بەلگىلەرى بولۋى مۇمكىن.

وسىعان بايلانىستى اگەنتتىك كاسىپكەرلىك كودەكستىڭ 198-بابىنىڭ 1-تارماعىنا سايكەس، مونوپولياعا قارسى زاڭنامانىڭ بۇزىلۋىنا اكەلۋى مۇمكىن ارەكەتتەرگە جول بەرمەۋ تۋرالى جازباشا الدىن الا ەسكەرتۋ جولدادى.

اگەنتتىك بۇل ەسكەرتۋدىڭ الدىن الۋ سيپاتىندا ەكەنىن جانە ونىڭ ىقتيمال قۇقىق بۇزۋدىڭ الدىن الۋعا، تۇتىنۋشىلاردىڭ قۇقىقتارىن قورعاۋعا ءارى تاكسي اگرەگاتورلارى قىزمەتتەرى نارىعىندا ادال باسەكەلەستىكتى قامتاماسىز ەتۋگە باعىتتالعانىن اتاپ وتەدى.

ايتا كەتەلىك قازاقستاندا Yandex Go سەرۆيستەرىنىڭ جۇمىسى توقتاعان ەدى. سونىمەن قاتار جاسلان ماديەۆ ياندەكستەگى اقاۋلار جونىندە پىكىر بىلدىرگەن ەدى.