تاكسي جۇرگىزۋشىلەرىنىڭ جارتى ميلليوننان استامى جاڭا سالىق رەجيمىنە كوشتى

ال ينتەرنەت-پلاتفورمالار ارقىلى جۇمىس ىستەيتىن ازاماتتار ءۇشىن 16,1 ميلليارد تەڭگە الەۋمەتتىك تولەم اۋدارىلعان. بۇل تۋرالى پرەمەر-ءمينيستردىڭ ورىنباسارى - ۇلتتىق ەكونوميكا ءمينيسترى سەرىك جۇمانعارين قۇرىلتاي دەپۋتاتتارىنىڭ ساۋالىنا بەرگەن جاۋابىندا مالىمدەدى.

ءمينيستردىڭ جاۋابىنا سايكەس، 2026-جىلعى 1-قازانداعى جاعداي بويىنشا ءوزىن-ءوزى جۇمىسپەن قامتىعاندارعا ارنالعان ارناۋلى سالىق رەجيمىن 981,2 مىڭ ادام قولدانعان. ولاردىڭ 866,9 مىڭى ينتەرنەت-پلاتفورمالار ارقىلى قىزمەت كورسەتسە، 114,2 مىڭى ءوز بەتىنشە جۇمىس ىستەيدى.

بۇل رەجيمدى پايدالاناتىنداردىڭ باسىم بولىگى تاكسي جانە كۋرەرلىك قىزمەتكە تيەسىلى. اتاپ ايتقاندا 519,7 مىڭ ادام جولاۋشى تاسىمالداۋمەن، تاعى 292,5 مىڭ ادام كۋرەرلىك قىزمەتپەن اينالىسادى. ەكى باعىتتاعى ازاماتتاردىڭ ۇلەسى اتالعان سالىق رەجيمىن قولدانۋشىلاردىڭ 83 پايىزى.

ءمينيستردىڭ مالىمەتىنشە، ينتەرنەت-پلاتفورمالار ارقىلى جۇمىس ىستەيتىن 866,9 مىڭ ازامات ءۇشىن جالپى سوماسى 16,1 ميلليارد تەڭگە الەۋمەتتىك تولەم اۋدارىلعان. ونىڭ ىشىندە مىندەتتى زەينەتاقى جارنالارىنا 4,4 ميلليارد تەڭگە، جۇمىس بەرۋشىنىڭ مىندەتتى زەينەتاقى جارنالارىنا 3,8 ميلليارد تەڭگە، الەۋمەتتىك اۋدارىمدارعا 3,9 ميلليارد تەڭگە جانە مىندەتتى الەۋمەتتىك مەديتسينالىق ساقتاندىرۋعا 4,1 ميلليارد تەڭگە باعىتتالعان.

سەرىك ءجۇمانعاريننىڭ ايتۋىنشا، 2026-جىلعى 1-قازانداعى جاعداي بويىنشا جاڭا رەجيمگە قاتىسۋشىلاردىڭ 807,3 مىڭى وسى جۇيەگە جاڭادان قوسىلعان ازاماتتار.

بيىل جەكە كاسىپكەر رەتىندە تىركەۋدەن شىققان ازاماتتاردىڭ ءبارى بىردەي كاسىبىن توقتاتقان جوق. ءمينيستردىڭ جاۋابىنا سايكەس، 2026-جىلدىڭ العاشقى توعىز ايىندا 356,2 مىڭ جەكە كاسىپكەر ەسەپتەن شىعارىلعان. ولاردىڭ اراسىندا وتكەن جىلى مۇلدە تابىس تاپپاعاندار دا بار.

اتاپ ايتقاندا قىزمەتىن توقتاتقان جەكە كاسىپكەرلەردىڭ 73,9 مىڭى ءوزىن-ءوزى جۇمىسپەن قامتىعاندارعا ارنالعان جاڭا سالىق رەجيمىنە كوشكەن. تاعى 151,8 مىڭ كاسىپكەردىڭ 2025-جىلى تابىسى بولماعان. ال 102,4 مىڭ ادامنىڭ جىلدىق تابىسى 10 ميلليون تەڭگەگە دەيىن جەتكەن.

تىركەۋدەن شىققان جەكە كاسىپكەرلەردىڭ كەمىندە 225,7 مىڭى بۇرىن بەلسەندى جۇمىس ىستەمەگەن نەمەسە قىزمەتىن باسقا مارتەبەدە جالعاستىرعان ازاماتتارعا تيەسىلى.

ايتا كەتەيىك، بۇعان دەيىن، كۋرەر، تاكسي جۇرگىزۋشىلەرى مەن فريلانسەرلەر ءۇشىن جاڭا ەرەجە ازىرلەنگەنىن جازعان ەدىك.