«تاكسي اجە». ماڭعىستاۋدا جەتپىستەن اسقان كەيۋانا تالايدى تاڭقالدىرىپ ءجۇر
اقتاۋ. KAZINFORM — ماڭعىستاۋلىقتارعا ەرەكشە تانىس تاكسي اجە بيىل جەتپىس جاستان استى.
العاش رەت تۇرمىس جايىمەن وتباسىن اسىراۋ ءۇشىن تەمىر تۇلپاردى تىزگىندەپ، كولىكتىڭ رولىنە وتىرعان گۇلشارا جولداسبايەۆا ماڭعىستاۋدىڭ ءدۇيىم جۇرتى جاقسى تانيدى. 49 جاسىندا ءناپاقا تابۋ ءۇشىن تاكسي اتانعان اجە 25 جىلدان بەرى جولاۋشى تاسىپ ءجۇر.
ەگدە تارتقانىنا قاراماستان كەيۋانا اقتاۋ قالاسى ماڭعىستاۋ اۋدانىنىڭ ورتالىعى شەتپەنىڭ اراسىندا جولاۋشى تاسۋدى بۇگىندە وزگەرمەيتىن ۇردىسكە اينالدىرعان.
«ءومىر بولعان ءتۇرلى جاعدايلار ادامنىڭ باسىنان وتەدى عوي. ءبىراق تاعدىردىڭ اۋىرتپالىعى دەپ قول قۋسىرىپ وتىرا بەرگەن ەش ادامعا جاراسپايدى. 90-جىلدارى مەنىڭ وتباسىمدى اسىراۋ كەرەك بولدى. سول ۋاقىتتا بالالارىم كىشكەنتاي ەدى. ءارى جولداسىم دا بولمادى. سوندىقتان ەر ادامنىڭ جۇمىسىنا ارالاسۋىما امالسىز تۋرا كەلدى»، - دەيدى تاكسي اجە.
گۇلشارا جولداسبايەۆا باستاپقىدا اۋىل ىشىندە تاكسي بولعان. كەيىن اقتاۋ مەن شەتپە كەنتىنىڭ اراسىندا قاتىنايتىن جولاۋشىلاردى تاسىمالداۋعا كوشكەن.
«اۋىلدا تاكسي بولىپ ابدەن ۇيرەنگەن سوڭ اراعا 4-5 جىل سالىپ اقتاۋ مەن شەتپە اراسىندا جولاۋشى تاسىمالداۋعا كوشتىم. كولىككە وتىراردا ادامدار تاڭ قالاتىن. كوبى ايەل جۇرگىزۋشى دەپ سەنىڭكىرەمەي، وتىرمايتىن. الايدا كەيىن مۇنداي جاعداي ساپ تىيىلدى»، - دەپ ەسكە الادى قارت تاكسيشى.
كۇندە تاكسي بولعالى بەرى اجەنىڭ تۇراقتى جولاۋشىلار دا پاي بولعان. ولاردىڭ الدىڭ 15 جىلدان بەرى گۇلشارا جولداسبايەۆا تىزگىندەگەن كولىككە وتىرۋدى وزدەرىنە مىندەت سانايدى.
«قانشا جولدا جۇرسەم دە وسى كۇنگە دەيىن جول ەرەجەسىن بۇزباپپىن. جىلدامدىقتى دا شامادان تىس اسىرعان كەزىم بولعان ەمەس. جولاۋشى ءۇشىن كۇننىڭ ۋاقىتىنا قاراعان كەزىم بولمادى. اۋرۋحاناعا، اۋەجايعا كەشىككەن ادامداردى دا ۋاقىتىنان كەشىكتىرمەي جەتكىزگەن كەزدەرىم بولدى. تاكسيلىكتەن تاپقان قارجىمەن بالا- شاعامدى ءوسىردىم. ءتىپتى، كولىك سىنعان ساتتە ءوزىم جوندەيتىنمىن»، - دەيدى گۇلشارا جولداسبايەۆا.
ادەتتە تاكسيدى كاسىپ قىلعانداردىڭ قارتامىسى بولسا دا ولاردىڭ بارلىعى اق ساقالدى اتالار ەكەنى بەلگىلى. الايدا وزگە وڭىردەن كەلگەن اجەنىڭ كولىگىنە وتىرعان سايىن تاڭدانىستارىن جاسىرا المايدى. اجەمىزدىڭ ايتۋىنشا، ول كىسى ماڭعىستاۋ اۋدانىنا قاراستى جىڭعىلدى اۋىلىندا دۇنيەگە كەلگەن. بۇگىندە ءۇش ۇلى مەن ءتورت قىزىنان تۋعان 22 نەمەرە-شوبەرەلەرى اجەسىنە اسقان زور قۇرمەتپەن قارايدى.
ايتا كەتەتىن جايت، اجەي 1999 -جىلدان بەرى تاكسي قىزمەتى ءۇشىن 6-7 رەت كولىك الماستىرعان. اۋەلدە كوپشىلىككە «موسكۆيچ 412» - ءنى دە تىزگىندەدى. كەيىن «شەستەركا» اتىمەن تانىمال «جيگۋلي 2106» كولىگىن مىنگەن. بەرى شەتەلدىك كولىككە وتىرىپ، «وپەلمەن» تالاي ەلدى جەتەر جەرىنە جەتكىزدى. بۇگىندى «تويوتا كامريدە» جۇرگەن اپا گۇلشارا جولداسبايەۆا ماڭعىستاۋداعى بىرەگەي تاكسي.
«ومىردە ىستەيتىن جۇمىستان قورقۋدىڭ قاجەتى جوق. بىلەكتى سىبانىپ كىرىسسەڭ سەن المايتىن اسۋ قالمايدى. ەڭ باستىسى ادامدا تابىس تابۋعا دەگەن نيەتتىڭ بولۋى شارت. ءوزىڭنىڭ جۇمىسىندى اسقان ماحابباتپەن ادال اتقارساڭ تابىستى بولارىڭ انىق»، - دەيدى تاكسي اجەي گۇلشارا جولداسبايەۆا.
اۆتور
جانكەلدى قارجان
