تاجىكستاندا ءلۇپىل مەن رەپوست ءۇشىن قىلمىستىق جازا جويىلدى
استانا. KAZINFORM - تاجىكستان پرەزيدەنتى ەمومالي راحمون الەۋمەتتىك جەلىدەگى رەاكسيالار ءۇشىن قىلمىستىق جازانى الىپ تاستايتىن زاڭعا قول قويدى، دەپ حابارلايدى DW.
تاجىكستاندا الەۋمەتتىك جەلىدەگى ماتەريالدارعا ءلۇپىل باسىپ، رەپوست جاساعانى ءۇشىن جازالاۋ تۋرالى نورما قىلمىستىق كودەكستەن الىندى. «ازاتتىق راديوسىنىڭ» حابارلاۋىنشا، ەل پرەزيدەنتى ەمومالي راحمون ءتيىستى زاڭعا سارسەنبى، 14-مامىردا قول قويدى.
- تۇزەتۋلەر لاڭكەستىككە جاريا شاقىرۋلار جانە ينتەرنەتتە لاڭكەستىكتى اقتاۋدى كوزدەيتىن باپتارعا قاتىستى بولىپ وتىر، - دەپ ناقتىلادى باسىلىم.
2018 -جىلدان بەرى تاجىكستاندا لۇپىلدەن باستاپ رەپوستتارعا دەيىنگى ەڭ از بەلسەندىلىك ءۇشىن 10-15 -جىلعا دەيىن باس بوستاندىعىنان ايىرىلۋ مۇمكىن بولعان، دەيدى تىلشىلەر.
«ازاتتىق راديوسى» تاجىكستان باس پروكۋرورىنىڭ ءبىرىنشى ورىنباسارى ۋمەد كاريمزوداعا سىلتەمە جاساپ اتاپ وتكەندەي، بۇگىندە ورتالىق ازيانىڭ وسى ەلىندە الەۋمەتتىك جەلىلەردەگى پىكىرى مەن رەاكتسياسى ءۇشىن 1500 دەن استام ادام جازاسىن وتەپ جاتىر.
2024 -جىلدىڭ كوكتەمىندە ەمومالي راحموننىڭ ءوزى «بۇل تاجىريبەنى توقتاتۋ كەرەك» ەكەنىن، ويتكەنى «ادامداردى تەك ينتەرنەتتەگى بەلسەندىلىگى ءۇشىن جازالاۋعا بولمايتىنىن» مالىمدەدى. ساۋىردە تاجىكستان پارلامەنتىنىڭ تومەنگى پالاتاسى ءتيىستى تۇزەتۋلەردى ءبىراۋىزدان قولدادى.
