بالالارعا 14 جاسقا دەيىن الەۋمەتتىك جەلىنى پايدالانۋعا تىيىم سالماق
استانا. KAZINFORM - تاجىكستان پارلامەنتىنىڭ دەپۋتاتى ديلنوزا احمادزودا الەۋمەتتىك جەلىلەردى پايدالانۋ ءۇشىن جاس شەكتەۋىن ەنگىزۋدى ۇسىندى، دەپ حابارلايدى Kazinform اگەنتتىگىنىڭ مەنشىكتى ءتىلشىسى ASIA- Plus قا سىلتەمە جاساپ.
ول 14 جاسقا دەيىنگى كامەلەتكە تولماعاندارعا الەۋمەتتىك جەلىلەرگە تولىق تىيىم سالۋدى، ال 14 پەن 17 جاس ارالىعىنداعى جاسوسپىرىمدەرگە - تەك اتا-اناسىنىڭ جازباشا كەلىسىمىمەن پايدالانۋعا رۇقسات بەرۋدى ۇسىندى.
دەپۋتاتتىڭ پىكىرىنشە، ينتەرنەت پەن الەۋمەتتىك جەلىلەردى شەكتەن تىس پايدالانۋ بالالاردىڭ پسيحيكالىق جانە رۋحاني دامۋىنا كەرى اسەر ەتۋى مۇمكىن.
ول بيىل ەل ۇكىمەتى «بالا قۇقىعىن قورعاۋ تۋرالى» زاڭعا جالعان جانە زياندى اقپاراتقا قاتىستى ءبىرقاتار وزگەرىستەر ەنگىزگەنىن اتاپ ءوتتى. دەگەنمەن، زاڭعا بالالار مەن جاسوسپىرىمدەردىڭ الەۋمەتتىك جەلىلەردى پايدالانۋىن باقىلاۋعا الۋعا مۇمكىندىك بەرەتىن قوسىمشا تۇزەتۋلەر قاجەت ەكەنىن ايتتى.
ساراپشىلار الەۋمەتتىك جەلىلەرگە تولىق تىيىم سالۋ ماسەلەنى شەشپەيتىنىن، بۇل ماسەلەدە ساقتىق پەن جان-جاقتى ءتاسىلدىڭ قاجەت ەكەنىن العا تارتادى. ولاردىڭ پىكىرىنشە، جاستارعا تسيفرلىق گيگيەنا ەرەجەلەرىن ۇيرەتۋ، سىني ويلاۋ قابىلەتىن دامىتۋ جانە اعارتۋشىلىق جۇمىستاردى كۇشەيتۋ ماڭىزدى.
ايتا كەتەيىك، اۋستراليادا 16 جاسقا تولماعان بالالارعا YouTube اككاۋنتتارىنا كىرۋگە تىيىم سالىنادى.
