تاجىكستان مەن قىتاي پامير ارقىلى سيفرلىق ءدالىزدى ىسكە قوستى

تاجىكستان ۇكىمەتىنىڭ بايلانىس قىزمەتىنىڭ مالىمەتىنشە، تاجىكستان مەن قىتاي اراسىنداعى حالىقارالىق سيفرلىق ءدالىزدىڭ اشىلۋ ءراسىمى 17-قازاندا دۋشانبەدە ءوتتى.

تاجىكستان اۋماعىنداعى تالشىقتى-وپتيكالىق بايلانىس جەلىسى دۋشانبە - حوروگ - قۇلما باعىتىمەن 1010 شاقىرىمعا سوزىلىپ جاتىر. ونىڭ 435 شاقىرىمدىق ەڭ كۇردەلى بولىگى تاۋلى-باداحشان اۆتونوميالىق وبلىسىنىڭ بيىك تاۋلى اۋماعى ارقىلى وتەدى. ال قىتايدىڭ بايلانىس جەلىسىنە قوسىلاتىن توراپ تەڭىز دەڭگەيىنەن 4363 مەتر بيىكتىكتەگى قۇلما اسۋىندا ورنالاسقان.

قىتاي اۋماعىنداعى جەلىنىڭ ۇزىندىعى 6100 شاقىرىمدى قۇرايدى. جاڭا جەلىنىڭ باستاپقى دەرەكتەر وتكىزۋ جىلدامدىعى سەكۋندىنا 1 تەرابيتكە جەتەدى. الداعى جىلدارى بۇل كورسەتكىشتى 10 تەرابيتكە دەيىن ارتتىرۋ جوسپارلانىپ وتىر.

- تاجىكستان دەرەكتەر ترانزيتىن دامىتۋ ءۇشىن زور مۇمكىندىككە يە بولدى. ونىڭ اۋماعى ارقىلى قىتاي مەن ورتالىق ازيا ەلدەرى، ال كەلەشەكتە وڭتۇستىك ازيا مەملەكەتتەرى اراسىندا سيفرلىق دەرەكتەردى تاسىمالداۋعا بولادى. بۇل - كەزەكتى بايلانىس جەلىسى عانا ەمەس، تاجىكستاننىڭ سيفرلىق جىبەك جولىنداعى ترانزيتتىك ءرولىن كۇشەيتەتىن جاڭا باعىت، - دەپ حابارلادى ۆەدومستۆو.

جاڭا سيفرلىق ءدالىز تاجىكستاننىڭ بەسىنشى حالىقارالىق بايلانىس ارناسى بولدى. جوبانى ىسكە قوسۋ ەلدىڭ 2030-جىلعا دەيىنگى ۇلتتىق دامۋ ستراتەگياسى مەن 2040-جىلعا دەيىنگى بايلانىس سالاسىن دامىتۋ ستراتەگياسىندا كوزدەلگەن. باستى ماقساتتاردىڭ ءبىرى - ەلدىڭ حالىقارالىق بايلانىس باعىتتارىن كەڭەيتىپ، 2030-جىلعا قاراي حالىقارالىق ارنالار ارقىلى سەكۋندىنا 2 تەرابيتكە دەيىن دەرەك تاسىمالداۋعا قول جەتكىزۋ.

بۇعان دەيىن ب ۇ ۇ دامۋ باعدارلاماسى تاجىكستاننىڭ دامۋىنا 84 ميلليون دوللار بولەتىنى حابارلانعان بولاتىن.