تاشكەنتتە ۋلانىپ، اۋرۋحاناعا تۇسكەن فۋتبولشىلاردىڭ قانشاسى ەلگە ورالدى

بۇل تۋرالى قازاقستانداعى بالا قۇقىقتارى جونىندەگى ۋاكىل دينارا زاكيەۆا مالىمدەدى.

ونىڭ ايتۋىنشا، ول وزبەكستانداعى بالا قۇقىقتارى جونىندەگى ۋاكىلمەن، قاراعاندى وبلىسى اكىمىنىڭ ورىنباسارى الىبەك الدەنەيمەن جانە كوماندانىڭ باس باپكەرىمەن تۇراقتى بايلانىستا.

- وزبەكستاننىڭ دەنساۋلىق ساقتاۋ ءمينيسترى جاعدايدى جەكە باقىلاۋىنا العان. بالالار تولىق ساۋىعىپ شىققانشا وزبەكستاندا بولادى. ال قالعان بالالار اتا-انالارىمەن بىرگە بۇگىن قازاقستانعا قايتادى، - دەپ حابارلادى دينارا زاكيەۆا.

قاراعاندى وبلىسىنىڭ دەنە شىنىقتىرۋ جانە سپورت باسقارماسى دا جاعدايعا قاتىستى مالىمەت بەردى. ۆەدومستۆو تۋرنيرگە قاتىسقان كوماندالاردىڭ جاتتىقتىرۋشىلارىمەن ۇزدىكسىز بايلانىستا ەكەنىن مالىمدەدى.

باسقارمانىڭ حابارلاۋىنشا، تاشكەنتتەگى ستاتسيوناردا 11 بالا مەن ءۇش اتا-انا دارىگەرلەردىڭ باقىلاۋىندا.

بۇدان بولەك، ساپارعا قاتىسقان 15 ادام - سپورتشىلار، اتا-انالار مەن جاتتىقتىرۋشىلار تاشكەنت اۋەجايىنان ساعات 15:10- دا HY721 رەيسىمەن استاناعا ۇشىپ شىقتى. قالعان قاتىسۋشىلار 3 قاراشادا «تۇركىستان - پاۆلودار» باعىتىنداعى پويىزبەن قاراعاندىعا ورالادى.

ەسكە سالايىق، حالىقارالىق Dostlik Cup 2026 تۋرنيرىندە قاراعاندى وبلىسىنىڭ نامىسىن Jas Batir، Nomad Akademiya جانە Skaut جەكەمەنشىك فۋتبول مەكتەپتەرىنىڭ تاربيەلەنۋشىلەرى قورعاۋعا اتتانىپ، جاپپاي ۋلانىپ قالعان.

جاس سپورتشىلار 2014, 2018 جانە 2019 -جىلى تۋعان بالالار اراسىنداعى جارىسقا قاتىستى. تاشكەنتكە بارلىعى 60 بالا، 32 اتا-انا جانە ءتورت جاتتىقتىرۋشى بارعان. ساپار شىعىندارى جەكە قاراجات ەسەبىنەن وتەلگەن.

ايتا كەتەيىك، باسقارمانىڭ 2-قاراشا كۇنى ساعات 09:00 دە تاراتقان العاشقى مالىمەتىندە تاشكەنت قالاسىنداعى № 5-قالالىق جۇقپالى اۋرۋلار اۋرۋحاناسىنا 16 بالا، ءبىر جاتتىقتىرۋشى جانە 11 اتا-انا جاتقىزىلعانى ايتىلعان. ولاردىڭ بارلىعى G’ayrat Hoji ota hotel قوناقۇيىندە تۇرىپ، سول جەردە تاماقتانعان.