تاشكەنتتە ازياداعى رەگبي سپورتىنىڭ دامۋى تالقىلاندى

وزبەكستان ۇلتتىق ۋنيۆەرسيتەتىنىڭ ستاديونىندا رەگبي-7 بويىنشا «Open Central Asia Championship» جارىسى ءوتتى، دەپ حابارلايدى Kazinform اگەنتتىگى UzA-عا سىلتەمە جاساپ.

تۋرنيرگە قازاقستان، وزبەكستان جانە قىرعىزستاننان 100 دەن استام رەگبيشى قاتىسىپ، كوماندالار ءوز ونەرلەرىن كورسەتىپ، جۇلدەلى ورىندارعا يە بولدى.

تارتىستى باسەكەنىڭ قورىتىندىسى بويىنشا ەرلەر اراسىنداعى جارىستا وزبەكستان-1 جانە وزبەكستان-2 كوماندالارى التىن جانە كۇمىس مەدالدى ەنشىلەدى، قولا جۇلدەنى قىرعىزستان وكىلدەرى يەلەدى.

ايەلدەر اراسىنداعى ماتچتاردىڭ قورىتىندىسى بويىنشا قازاقستان قۇراماسى جەڭىسكە جەتتى. قالعان جۇلدەلەر وزبەكستاننىڭ رەگبي كوماندالارىنا بۇيىردى.

چەمپيونات اياسىندا ازيا رەگبي فەدەراتسياسىنىڭ 2023 -جىلدىڭ قورىتىندىسى مەن كەلەسى جىلعا ارنالعان جوسپارلارىنا ارنالعان جيىن ۇيىمداستىرىلدى.

ازيا رەگبي فەدەراتسياسىنىڭ پرەزيدەنتى كايس ال-دحالاي مەن فەدەراتسيانىڭ اتقارۋشى كوميتەتىنىڭ مۇشەلەرى قاتىسقان جيىندا اتقارىلعان جۇمىستاردىڭ ەسەبى تىڭدالدى. رەگبي-7 جانە رەگبي-15 جارىستارىنا ۇلتتىق قۇرامالاردىڭ قاتىسۋىن قامتاماسىز ەتۋ، تورەشىلىك جانە جاتتىقتىرۋشىلىق قىزمەتى بويىنشا وقۋ كۋرستارىندا ءبىلىم الۋ، بەدەلدى جارىستارعا دايىندىق سىندى ماسەلەلەر جان-جاقتى تالقىلاندى.

جيىن سوڭىندا ازيا رەگبي فەدەراتسياسىنىڭ باسشىلارى تاشكەنتتە رەگبي-7 تۇرىنەن «Open Central Asia Championship» جوعارى دەڭگەيدە ۇيىمداستىرىلعانىن تىلگە تيەك ەتتى.