تاشكەنت قالاسىنا ت م د-نىڭ جاستار استاناسى مارتەبەسى بەرىلدى
تاشكەنت. KAZINFORM -وزبەكستاندا تاشكەنت قالاسىنا «ت م د- نىڭ جاستار استاناسى» مارتەبەسىن بەرۋ سالتاناتتى ءراسىمى ءوتتى، دەپ حابارلايدى Kazinform اگەنتتىگىنىڭ تاشكەنتتەگى مەنشىكتى ءتىلشىسى ءاليحان اسقار.
وعان وزبەكستان، رەسەي، ازەربايجان، ارمەنيا، بەلارۋس، قازاقستان، قىرعىزستان جانە تاجىكستان دەلەگاتسيالارىنىڭ باسشىلارى قاتىستى.
تاشكەنتكە ت م د- نىڭ العاشقى جاستار استاناسى مارتەبەسىن بەرۋ شەشىمى بىلتىر ماۋسىمدا سوچيدە وتكەن ت م د ەلدەرى ۇكىمەت باسشىلارى قەڭەسىنىڭ وتىرىسىندا قابىلدانعان بولاتىن.
بۇگىنگى سالتاناتتى شاراعا قاتىسۋشىلارعا ت م د باس حاتشىسى سەرگەي لەبەديەۆ قۇتتىقتاۋ حاتىن جولداپ، مەملەكەتارالىق بايلانىستار جەتىلىپ، جاڭا جوبالار مەن باعدارلامالار جۇزەگە اسا بەرەتىنىن اتاپ ءوتتى.
«ت م د- نىڭ جاستار استاناسى» جوباسى دوستاستىق ەلدەرىنىڭ جاستارىمەن ءوزارا بايلانىستى نىعايتۋ، دارىندى ازماتتاردىڭ الەۋەتىن دامىتۋ جانە حالىقارالىق ىنتىماقتاستىقتى جەتىلدىرۋ ماسەلەلەرىندە تاجىريبە الماسۋعا باعىتتالعان ءىرى جوبالاردىڭ ءبىرى»، - دەدى سەرگەي لەبەديەۆ.
ت م د- عا قاتىسۋشى مەملەكەتتەردىڭ جاستار ءىسى جونىندەگى كەڭەسى حاتشىلىعى باسشىسىنىڭ ورىنباسارى تاتيانا كوۆاليەۆا تاشكەنت حوكيماتىنا جاڭا مارتەبە بەرىلگەنىن ايعاقتايتىن كۋالىكتى تابىس ەتتى.
ايتا كەتەيىك، 2025 -جىلى ازەربايجاننىڭ گابالا قالاسى جاستار استاناسى بولادى، ال 2026 -جىلى بۇل مارتەبە ارمەنيانىڭ كاپان قالاسىنا بەرىلەدى.
