تاعى ءبىر بوكسشىمىز يتالياداعى ليتسەنزيالىق تۋرنيردى ءساتتى باستادى

استانا. KAZINFORM - بۇگىن بوكستان يتاليانىڭ بۋستو-ارسيتسيو قالاسىندا ءوتىپ جاتقان حالىقارالىق تۋرنيردە قازاقستان قۇراماسىنىڭ ساپىنان شارشى الاڭعا شىققان ەكىنشى بوكسشىمىز دا جارىستى جەڭىسپەن باستادى.

ناقتىراق ايتساق، 80 كەلى سالماقتا ەل نامىسىن قورعاپ جاتقان وتانداسىمىز نۇربەك وارلباي وليمپياداعا ىرىكتەۋ تۋرنيرىندەگى ءبىرىنشى جەكپە-جەگىندە گايتيلىك كەدريك بەلوني-دۋليەپرەنى جەڭدى.

وسىعان دەيىن 57 كەلىگە دەيىنگى سالماقتا سىنعا تۇسەتىن قازاقستاندىق بوكسشى ماحمۇد سابىرحان ءبىرىنشى اينالىمدا ەفيوپيالىق لەتا فيكرەماريام يادەسامەن جۇدىرىقتاسىپ، ەش قيىندىقسىز جەڭىسكە جەتكەنىن جازعان بولاتىنبىز.

سونداي-اق، وسىعان دەيىن ەرلەر اراسىندا 51 كەلىدە ساكەن بيبوسىنوۆ گونكونگتىق كاننەت چۋن حيم تانمەن قولعاپ ءتۇيىستىرىپ، كەلەسى كەزەڭگە وتسە، ايەلدەر اراسىندا 60 كەلىدە شارشى الاڭعا شىققان ريمما ۆولوسەنكو العاشقى جەكپە-جەگىن ءساتتى وتكىزگەن بولاتىن. ول جاۋاپتى سىندا ترينيداد توباگو ەلىنىڭ وكىلى تياننا گۋيمەن كەزدەسىپ، تورەشىلەر شەشىمىمەن باسىم ءتۇستى.

ليتسەنزيالىق تۋرنيردە 2024-جىلعى پاريج وليمپياداسىنىڭ جولدامالارى ساراپقا سالىنادى. بىلعارى قولعاپ شەبەرلەرى ەرلەر اراسىندا 28، ايەلدەر اراسىندا 21 جولداماعا تالاسادى.

تۋرنير 3-12- ناۋرىز ارالىعىندا وتەدى.

اۆتور كۇنسۇلتان وتارباي