تابىس سالىعى: بلوگەرلەر ميللياردتاعان كىرىسىن كورسەتە باستادى

استانا. KAZINFORM - تابىسىن تومەن كورسەتىپ سالىقتان جالتارعان قازاقستاندىق بلوگەرلەر كىرىسىن راستاپ، سالىق تولەي باستادى. بۇل تۋرالى قارجى ۆيتسە-ءمينيسترى ەرجان ءبىرجانوۆ ءمالىم ەتتى.

- بۇگىندە 50 دەن استام بلوگەر 2,5 ميلليارد تەڭگەدەن استام كىرىسىن كورسەتتى. ولار بويىنشا سالىق تولەندى. قالعاندارى بويىنشا ءالى ۋاقىت بار، 30 جۇمىس كۇنى بەرىلدى. ناۋرىز ايىنىڭ سوڭىنا دەيىن تەكسەرۋ جۇرگىزىپ، اقپاراتتى ۇسىنامىز، - دەپ قىسقا قايىردى ەرجان ءبىرجانوۆ ءماجىلىستىڭ جالپى وتىرىسىنان كەيىن ب ا ق وكىلدەرىنىڭ ساۋالىنا جاۋاپ بەرە تۇرىپ.

ايتا كەتسەك، اقپاننان باستاپ مەملەكەتتىك كىرىستەر كوميتەتى تابىسىن تومەن كورسەتكەن 594 بلوگەرگە قاتىستى 53,3 ميلليارد تەڭگەنىڭ حابارلاماسىن جىبەرە باستادى. تەكسەرۋ، سالىستىرۋ قورىتىندىسى بويىنشا 594 تۇلعانىڭ تابىسىندا 53,3 ميلليارد تەڭگەگە سايكەسسىزدىك انىقتالعان.

كەيىن مەملەكەتتىك كىرىستەر كوميتەتى كەيبىر بلوگەرلەرگە جىبەرگەن تابىس سالىعىن تولەۋ تۋرالى حابارلاماسىن قايتارىپ الدى.

سونداي-اق الەم ەلدەرىندە بلوگەرلەر قانداي سالىق تولەيتىنى تۋرالى شولۋ جاساعان بولاتىنبىز.