تابيعاتتا تىنىققىڭىز كەلسە: شىعىس قازاقستاندا قىستا قايدا بارۋعا بولادى
شىعىس قازاقستان - تابيعات تاماشاسىن بويىنا سىڭىرگەن ولكە. اسپانمەن استاسقان تاۋلاردىڭ بوكتەرىندەگى دەمالىس بازالارىنا بارىپ، شاڭعىمەن سىرعاناپ، ءيت تۇمسىعى وتپەيتىن نۋ ورمان اراسىنداعى ۇيشىكتەردە ايالداپ، ساف اۋامەن تىنىستاۋ بويعا قۋات، جانعا راحات سىيلايدى. وسى رەتتە Kazinform ءتىلشىسى وڭىردەگى دەمالىس بازالارى جايلى اقپارات جيناستىرىپ كوردى.
«نۇرتاۋ» دەمالىس بازاسى
نۇرتاۋ وسكەمەننەن 35 شاقىرىم، گلۋبوكوە اۋدانى بوبروۆكا اۋىلىنان 8 شاقىرىم جەردە ورنالاسقان. كەزىندە «بيپەك اۆتو» كومپانياسىنىڭ باسشىسى اناتوليي بالۋشكيننىڭ يەلىگىندە بولعان. وعان قاتىستى سوت ءىسى باستالعالى دەمالىس بازاسىنىڭ جۇمىسى توقتاپ قالعان- تۇعىن. الايدا حالىقتىڭ سۇرانىسىمەن ش ق و اكىمدىگى قۇزىرلى ورگاندارمەن كەلىسسوز جۇرگىزىپ، 2023 -جىلى بازا قايتا اشىلدى.
قالا تۇرعىندارىنىڭ دەنى وسى جەرگە كەلىپ دەمالادى. اسىرەسە جاستار قاراسى كوپ. وندا تومەندەگىدەي قىزمەتتەر ۇسىنىلعان:
- ىلمەكتى كوتەرگىشپەن جابدىقتالعان ەكى تاۋ شاڭعىسى تراسساسى؛
- ستيۋبپەن سىرعاناۋعا ارنالعان جەكە تراسسا؛
- شاڭعى تەۋىپ ۇيرەنەتىن جەكە جولاق؛
- تاۋ شاڭعىسى جاراقتارىن جالعا الۋ جانە جوندەۋ؛
- شاڭعى تەبۋگە ۇيرەتەتىن مەكتەپ (بالالار مەن ەرەسەكتەرگە، جەكەلەي جانە توپپەن بارىپ، ارنايى ماماننان ءدارىس الۋ)؛
- «تەرەم و ك» اتالاتىن تاربيەشىسى بار بالاباقشا. ءبىر ساعاتى - 3500 تەڭگە. ءتۇرلى ويىندار ويناۋعا مۇمكىندىك بەرەتىن شىعارماشىلىق ۇيىرمەلەر دە بار؛
بازاداعى ءقوناقۇيدىڭ كەلۋشىلەرگە ءاردايىم ەسىگى اشىق. مۇندا مونشاعا ءتۇسىپ، ماسساج الۋعا بولادى. ءجۇزۋدى جاقسى كورەتىندەر ءۇشىن باسسەين جۇمىس ىستەپ تۇر. سونداي-اق كوتتەدجدەردى جالعا الا الاسىز. باعاسى ءبىر كۇنگە 230 مىڭ تەڭگە مەن 500 مىڭ تەڭگەگە ارالىعىندا ەكەنىن ايتا كەتەيىك.
«سينەگورە» دەمالىس بازاسى
ريددەر قالاسىنىڭ ماڭىنداعى گروموتۋحا وزەنىنىڭ جاعاسىندا ورنالاسقان. اينالاسىن قاراعايلى ورمان قورشاپ تۇر.
دەمالىس ورنى تىنىعۋشىلار ءۇشىن:
- كونكي تەبۋ؛
- شاڭعىمەن جۇگىرۋ؛
- ستيۋبپەن تاۋدان سىرعاناۋ؛
- سپورتتىق جابدىقتاردى جالعا الۋ قىزمەتتەرىن ۇسىنادى.
ءبىر ايتا كەتەرلىگى، اتالمىش دەمالىس بازاسىندا جەلتوقسان ايىنىڭ 14-29-كۇندەرى ارالىعىندا اياز اتا رەزيدەنتسياسى جۇمىس ىستەپ تۇرادى. اق ساقالدى اياز اتاعا اتا- انالار بالالارىن ەرتىپ اكەلە الادى.
«التاي ءالپىسى» تاۋشاڭعى كەشەنى
وسكەمەننەن 24 شاقىرىم جەردە، تاۋلى ءۇلبى شاتقالىندا ورىن تەپكەن. مۇندا شاڭعىشىلار مەن سنوۋبوردشىلار تەك قازاقستاننان ەمەس، الەمنىڭ تۇكپىر-تۇكپىرىنەن كەلەدى. باعاسى سالىستىرمالى تۇردە باسقالاردان ارزان. قوناقۇيدەگى ەكى ادامدىق ليۋكس بولمە اقىسى جۇمىس كۇندەرى - 65 مىڭ تەڭگە، دەمالىس كۇندەرى - 78 مىڭ تەڭگە. بۇل باعاعا تاڭعى جانە ءتۇستى اس كىرەدى. ال جارتىلاي ليۋكس 34-40 مىڭ تەڭگە ارالىعىندا.
كەشەندە ءتورت ارقاندى جولاق بار. جولاقپەن كوتەرىلىپ، تاۋدان شاڭعىمەن سىرعاناپ تۇسەسىز. تاۋ- شاڭعىسى جابدىقتارىن جالعا الۋعا بولادى. وندا شاڭعى، سنوۋبورد جانە ستيۋب الا الاسىز.
تاۋ- شاڭعى جانە سنوۋبورد مەكتەبى جۇمىس ىستەيدى. جەكەلەي جانە توپپەن ساباق وتۋگە مۇمكىندىك بار. بۇدان بولەك، سالت اتپەن سەرۋەندەۋگە بولادى. 15 مينۋتى - 2000 تەڭگە، ءبىر ساعاتى - 5000 تەڭگە. بالىق اۋلاۋعا قىزىعاتىندار دا وسىندا قۇلشىنا كەلەدى. قارماقتى جالعا الۋ - 1000 تەڭگە، اۋلانعان بالىقتىڭ ءبىر كەلىسى - 4500 تەڭگە.
«زينوۆيەۆكا» دەمالىس ورنى
وسكەمەننەن 85 شاقىرىم جەردە تۇر. دەمالىس ورنى قالىڭ ورماننىڭ قاق ورتاسىندا ورنالاسقاندىقتان كەلۋشىلەر تابيعاتتى الاڭسىز تاماشالاپ، سەرگەك سەرۋەن قۇرىپ قايتادى. ودان بولەك، مۇندا شاڭعىمەن تاۋدان تومەن قاراي سىرعاناۋعا بولادى. كۆادراتسيكل جانە قاردا جۇرەتىن كولىكپەن قىدىرا الاسىز. ات جەگىلگەن شاناعا 4 ادام وتىرىپ سەرۋەندەۋ ءۇشىن دە بارلىق جاعداي جاسالعان. ستيۋبپەن سىرعاناپ، مۇز ايدىنىندا كونكي تەبۋگە بولادى.
«كليموۆكا» دەمالىس بازاسى
ريددەردەن 30 شاقىرىم جەردە ورنالاسقان. بۇل - وتباسىلىق دەمالىس ورنى.
التاي تاۋىنىڭ بوكتەرىندەگى بازادا 11 ءۇي بار. ونىڭ ىشىندە پەشپەن جىلىتىلاتىن 7 جانە فين تەحنولوگياسى بويىنشا جاسالعان 4 اعاش ءۇيدىڭ ەسىگى كەلۋشىلەر ءۇشىن ءاردايىم اشىق. ولار ءبىر ۋاقىتتا 40 دەمالۋشىنى قابىلداي الادى. وسىنشاما ادامعا ارنالعان اسحانا جۇمىس ىستەيدى. 4 مونشانىڭ ەكەۋىندە باسسەين بار. دەمالىس ورنىندا مىناداي قىزمەت تۇرلەرى كورسەتىلەدى:
- ستيۋبپەن سىرعاناۋ؛
- سالت اتپەن، ەسەكپەن سەرۋەندەۋ؛
- ورماندى ارالاۋ،
- شاڭعى تەبۋ؛
- زووباق.
