تاۋ بوكتەرىندەگى قۇرىلىسقا باقىلاۋدى كۇشەيتەمىز - دوسايەۆ الماتىداعى كوشكىن تۋرالى
الماتى. KAZINFORM - الماتى اكىمى ەربولات دوسايەۆ مەدەۋ اۋدانى تۇرعىندارىمەن كەزدەسۋىندە ەڭ الدىمەن «تاۋ سامالى» شاعىن اۋدانىنداعى لاي كوشكىنى تۋرالى ايتتى.
شاھار باسشىسى قايتىس بولعان وتباسىنىڭ تۋىستارىنا كوڭىل ايتىپ، جاقىندارىنا قانداي قولداۋ كورسەتىلەتىنىن جەتكىزدى.
«تاۋ سامالى» شاعىن اۋدانىندا قازا تاپقان وتباسىنىڭ قارجىلىق مىندەتتەمەسى وتەلەدى. اكىمدىك جەرلەۋدى ۇيىمداستىرۋ مەن ەسكە الۋ ءىس-شارالارىن وتكىزۋ بويىنشا بارلىق قاجەتتى كومەك كورسەتەدى. بۇل وتباسىنىڭ شەتەلدە وقيتىن ۇلكەن ۇلى دميتري شيننىڭ وقۋىنا قارجىلاي قولداۋ كورسەتىلەدى، سونىمەن قاتار، اتا-اناسىنىڭ قارجىلىق مىندەتتەمەسىن شەشۋگە جاردەمدەسەدى»، - دەدى ەربولات دوسايەۆ مەدەۋ اۋدانىنىڭ تۇرعىندارىمەن كەزدەسۋ بارىسىندا.
قالا باسشىسى اكىمدىك الماتى تاۋ بوكتەرىندەگى قۇرىلىستى باقىلاۋدى كۇشەيتۋ بويىنشا كەشەندى جۇمىس جۇرگىزىپ جاتقانىن جانە «تاۋ سامالى» شاعىن اۋدانىنداعى قايعىلى وقيعا ءتيىستى شارالاردى كۇشەيتۋ قاجەتتىگىن دالەلدەگەنىن ەرەكشە اتادى.
ماسەلەن، 2022 -جىلدىڭ ماۋسىم ايىندا ءماسليحات 15 گرادۋستان اساتىن تاۋلى بەتكەيلەردەگى قۇرىلىسقا تىيىم سالۋدى ۇسىنىپ، قولداعان بولاتىن.
«وسى نورما قابىلدانعان ساتتەن باستاپ تاۋلى جەرلەردە زاڭسىز قۇرىلىستىڭ انىقتالعان 54 فاكتىدەن سوتتارعا 45 تالاپ-ارىز بەرىلدى، ونىڭ 31 ى قالانىڭ پايداسىنا شەشىلدى، 4 ۋى قاراستىرىلۋدا. قالعان 9 ى بويىنشا ەسكەرتۋلەر جويىلدى نەمەسە قۇرىلىس-مونتاج جۇمىستارى توقتاتىلدى جانە سوتقا تالاپ-ارىزدار دايىندالۋدا»، - دەدى ەربولات دوسايەۆ.
بۇل باعىتتاعى جۇمىس جالعاسادى. قازىر الماتىنىڭ 2040 -جىلعا دەيىنگى باس جوسپارىنا تولىق سايكەس كەلەتىن جانە قالا اۋماقتارىن قۇرىلىس ءۇشىن ءارتۇرلى تالابى بار ايماقتارعا بولەتىن ەگجەي-تەگجەيلى جوسپارلاۋدىڭ جاڭا جوبالارى بەكىتىلدى.
ەستەرىڭىزگە سالا كەتەيىك، 8-اقپاندا مەدەۋ اۋدانىنىڭ «تاۋ سامالى» شاعىن اۋدانىنداعى وليمپيسكي كوشەسى بويىندا تەحنوگەندىك سيپاتتاعى توپىراقتىڭ لايلانۋى سالدارىنان لاي كوشكىنى بولدى.
كەيىن الماتى قالاسى توتەنشە جاعدايلار دەپارتامەنتى مەن رەسپۋبليكالىق جەدەل-قۇتقارۋ جاساعىنىڭ كۇشتەرى ءۇيىندى استىنان ءتورت ادامنىڭ دەنەسىن تاپتى.
ولاردىڭ بارلىعى ءبىر وتباسىنىڭ مۇشەسى - 1984 -جىلى تۋعان ەر ادام، 1980 -جىلى تۋعان ايەل جانە 2007 -جىلعى ەگىز جاس ءوسپىرىم ۇل بالالار.
اۆتور
الما مۇقانوۆا
