گادجي گادجيەۆ قازا تاپقان اسكەريلەردىڭ وتباسىنا 100 ميلليون تەڭگە كومەك كورسەتەدى
استانا. KAZINFORM - قازاقستان حالىق كەڭەسىنىڭ مۇشەسى گادجي گادجيەۆ كاسپي تەڭىزىندەگى وقۋ-جاتتىعۋ كەزىندە قازا تاپقان اسكەري قىزمەتشىلەردىڭ وتباسىلارىنا قارجىلاي كومەك كورسەتىلەتىنىن مالىمدەدى.
قازاقستان حالىق كەڭەسىنىڭ تاعى ءبىر مۇشەسى، قازاقستان اۋىر اتلەتيكا فەدەراتسياسىنىڭ پرەزيدەنتى گادجي گادجيەۆ قازا تاپقان اسكەري قىزمەتشىلەردىڭ وتباسىلارىنا 100 ميلليون تەڭگە كولەمىندە ماتەريالدىق كومەك كورسەتۋ تۋرالى شەشىم قابىلداعانىن حابارلادى.
- مەملەكەت باسشىسى قاسىم-جومارت توقايەۆ ماڭعىستاۋ وبلىسىندا اسكەري قىزمەتشىلەردىڭ قازا بولۋىنا بايلانىستى جالپىۇلتتىق ازا تۇتۋ جاريالادى. كاسپي تەڭىزىندە وتكەن وقۋ-جاتتىعۋ كەزىندە قازا تاپقان اسكەري قىزمەتشىلەردىڭ تۋعان-تۋىستارى مەن جاقىندارىنا قايعىرىپ كوڭىل ايتامىن. قازاقستان حالىق كەڭەسىنىڭ مۇشەسى ءارى ەلىمىزدىڭ سپورت قاۋىمداستىعىنىڭ وكىلى رەتىندە قازا تاپقان اسكەري قىزمەتشىلەردىڭ وتباسىلارىنا 100 ميلليون تەڭگە كولەمىندە ماتەريالدىق قولداۋ كورسەتۋدى ءوزىمنىڭ ازاماتتىق پارىزىم دەپ سانايمىن. اسكەري بورىشىن وتەۋ كەزىندە قازا تاپقان جاۋىنگەرلەردىڭ جارقىن بەينەسى جادىمىزدا ماڭگى ساقتالادى، - دەدى قازاقستان اۋىر اتلەتيكا فەدەراتسياسىنىڭ پرەزيدەنتى.
بۇعان دەيىن بەلگىلى كاسىپكەر، قازاقستان حالىق كەڭەسىنىڭ مۇشەسى شاحمۇرات ءمۇتالىپ قازا تاپقان اسكەري قىزمەتشىلەردىڭ وتباسىنا 25 ميلليون تەڭگەدەن بولەتىنىن ايتتى.
ەسكە سالايىق، 2026-جىلعى 24-قىركۇيەكتە كاسپيدەگى اسكەري وقۋ-جاتتىعۋ كەزىندە 9 اسكەري قىزمەتشى قازا تاپقانىن حابارلاعانبىز. ءۇش اسكەري قىزمەتشى قۇتقارىلدى. ولاردىڭ بىرەۋى اۋرۋحاناعا جاتقىزىلدى.
كەيىننەن كاسپيدە قازا بولعان اسكەري قىزمەتشىلەردىڭ سانى 12 گە جەتىپ، ەكەۋى ىزدەستىرىلىپ جاتقانى حابارلاندى.
قورعانىس مينيسترلىگى وقۋ-جاتتىعۋ كەزىندە قازا تاپقان اسكەري قىزمەتشىلەردىڭ ءتىزىمىن جاريالادى.
اسكەري قىزمەتشىلەردىڭ قازا بولۋ فاكتىسى بويىنشا قىلمىستىق ءىس قوزعالىپ، تەرگەلىپ جاتقانىن جازدىق.
بۇدان بولەك، ماڭعىستاۋ وبلىسىندا اسكەري قىزمەتشىلەردىڭ قازا بولۋ سەبەپتەرىن تەرگەپ-تەكسەرۋ جونىندەگى ۇكىمەتتىك كوميسسيا قۇرىلدى. كوميسسيا قۇرامىنا قورعانىس ءمينيسترى، ماڭعىستاۋ وبلىسىنىڭ اكىمى، ەڭبەك جانە حالىقتى الەۋمەتتىك قورعاۋ، توتەنشە جاعدايلار، دەنساۋلىق ساقتاۋ، كولىك مينيسترلىكتەرىنىڭ باسشىلىعى، باس اسكەري پروكۋرور، سونداي-اق شەكارا قىزمەتىنىڭ وكىلدەرى كىردى.
پرەمەر- ءمينيستردىڭ ورىنباسارى قانات بوزىمبايەۆ باستاعان كوميسسيا ماڭعىستاۋ وبلىسىنا بارىپ، ءالى تابىلماعان اسكەري قىزمەتشىلەردى ۇزدىكسىز ىزدەستىرۋدى تاپسىردى.
سونىمەن قاتار، پرەزيدەنت قاسىم-جومارت توقايەۆ ماڭعىستاۋ وبلىسىندا اسكەري وقۋ- جاتتىعۋ كەزىندەگى قايعىلى وقيعا سالدارىنان قازا تاپقان اسكەري قىزمەتشىلەردىڭ تۋعان-تۋىستارىنا كوڭىل ايتتى.
