تۇماۋ ماۋسىمى: كىمدەر تەگىن ەكپە الا الادى

ەكپە كىمدەرگە تەگىن سالىنادى جانە ونى اقىلى تۇردە قايدان الۋعا بولادى؟

بۇل تۋرالى استانا قالاسىنىڭ سانيتاريالىق-ەپيدەميولوگيالىق باقىلاۋ دەپارتامەنتىنىڭ باسشىسى ايگۇل شاعالتايەۆا ەلوردالىق كوممۋنيكاتسيالار قىزمەتىندە وتكەن بريفينگتە ءمالىم ەتتى.

ونىڭ ايتۋىنشا، 2026-2027-جىلدارداعى ەپيدەميالىق ماۋسىمدا تۇماۋ، ءجىتى رەسپيراتورلىق ۆيرۋستىق ينفەكسيالار (ج ر ۆ ي) جانە COVID-19 ينفەكسياسىنىڭ تارالۋىنا جول بەرمەۋ ءۇشىن ءبىرقاتار پروفيلاكتيكالىق شارا قولعا الىنادى.

- الداعى ەپيدەميالىق ماۋسىمدا تۇماۋعا قارسى ەكپە جۇرگىزۋ ءۇشىن استانا قالاسىنىڭ قوعامدىق دەنساۋلىق ساقتاۋ باسقارماسى جەرگىلىكتى بيۋجەت قاراجاتىنا رەسەيدە وندىرىلگەن «گريپپول پليۋس» ۆاكسيناسىنىڭ 169005 دوزاسىن ساتىپ الدى، - دەدى ايگۇل شاعالتايەۆا.

كىمدەر تەگىن ەكپە الادى

ۇكىمەتتىڭ 2020-جىلعى 24-قىركۇيەكتەگى 612-قاۋلىسىنا سايكەس تۇماۋعا قارسى ەكپە تەگىن سالىناتىن بىرنەشە سانات بار.

ولار:

• مەديتسينالىق ۇيىمدا ديسپانسەرلىك باقىلاۋدا تۇرعان بالالار؛

• جەتىم بالالار جانە اتا-اناسىنىڭ قامقورلىعىنسىز قالعان بالالار؛

• مەديتسينالىق-الەۋمەتتىك مەكەمەلەردەگى ادامدار؛

• وسى مەكەمەلەردىڭ قىزمەتكەرلەرى.

سونىمەن قاتار تۇماۋ جۇقتىرۋ قاۋپى جوعارى ادامدارعا دا ەكپە الۋ ۇسىنىلادى. ولاردىڭ قاتارىندا جۇكتى ايەلدەر، مەديتسينا قىزمەتكەرلەرى، پەداگوگتەر، اسكەري قىزمەتشىلەر، جۇرەك-قان تامىرلارى مەن تىنىس الۋ جۇيەسىنىڭ سوزىلمالى اۋرۋلارى بار ادامدار جانە 65 جاستان اسقان تۇرعىندار بار. ەكپە ەرىكتى تۇردە سالىنادى.

ەكپەنى قايدان الۋعا بولادى

جەرگىلىكتى بيۋجەت قاراجاتىنا ساتىپ الىنعان ۆاكتسينا استاناداعى 41 العاشقى مەديتسينالىق-سانيتاريالىق كومەك ۇيىمىندا سالىنادى. ونىڭ ىشىندە 15 ەمحانا، دارىگەرلىك امبۋلاتوريالار، وتباسىلىق دەنساۋلىق ورتالىقتارى جانە باسقا دا مەديتسينالىق ۇيىمدار بار.

ال تۇماۋعا قارسى ەكپەنى اقىلى تۇردە العىسى كەلەتىن تۇرعىندار «وپەن كلينيك» مەديتسينالىق ورتالىعىنا جۇگىنە الادى. مۇندا دا رەسەيدە وندىرىلگەن «گريپپول پليۋس» ۆاكسيناسى سالىنادى.

تۇماۋدان قالاي ساقتانۋعا بولادى

ايگۇل شاعالتايەۆا سىرقاتتانۋشىلىق كوبەيگەن كەزدە قاراپايىم ساقتىق شارالارىن ۇستانۋعا كەڭەس بەردى.

- ينفەكسيانىڭ تارالۋ قاۋپىن ازايتۋ ءۇشىن قوعامدىق ورىنداردا ماسكا تاعىڭىز، ادام كوپ جينالاتىن جەرلەرگە بارۋدان اۋلاق بولىڭىز جانە مۇمكىندىگىنشە ناۋقاس ادامدارمەن قارىم-قاتىناستى شەكتەڭىز. بۇل اسىرەسە بالالار، ەگدە جاستاعى ادامدار جانە سوزىلمالى اۋرۋى بار ادامدار ءۇشىن ماڭىزدى. قولدى انتيسەپتيكپەن جيى تازالاپ وتىرۋ قاجەت، - دەدى ول.

دەپارتامەنت باسشىسى اۋرۋدى ەمدەگەننەن گورى ونىڭ الدىن الۋ وڭاي ەكەنىن ەسكە سالىپ، تۇرعىنداردى وزدەرىن جانە جاقىندارىن قورعاۋعا شاقىردى.

بۇعان دەيىن استانادا بالالار اراسىندا ج ر ۆ ي- مەن سىرقاتتانۋ 24 پايىزعا وسكەنى حابارلانعان ەدى.