تەڭگە تياناقتالعان باعامعا ورالۋى مۇمكىن بە – ۇ ب باسشىسى جاۋاپ بەردى

استانا. KAZINFORM - ۇلتتىق بانكتە وتكەن بريفينگىدە تيمۋر سۇلەيمەنوۆ ب ا ق وكىلىنىڭ «تەڭگە تياناقتالعان باعامعا قايتا ورالۋى مۇمكىن بە؟» دەگەن سۇراعىنا جاۋاپ بەردى.

Фото: Kazinform
Фото: Kazinform

— ءبىز ەشقانداي تياناقتالعان باعامعا ورالۋ شاراسىن قولعا العالى جاتقان جوقپىز. بۇل - مۇلدەم جاڭساق پايىم ءارى بۇرىس جول. ءبىز كەز كەلگەن ەكونوميستىڭ نەمەسە قارجىگەردىڭ مۇنداي پىكىرى بولۋى مۇمكىن ەكەنىن جوققا شىعارمايمىز، سەبەبى بۇل سالاداعى مونوپوليست ەمەسپىز. الايدا ءبىزدىڭ كوزقاراسىمىز بويىنشا، بۇل باعىت دۇرىس ەمەس. ونىڭ سوڭى ۇزاق مەرزىمدى ەكونوميكالىق زارداپتارعا سوقتىرادى، - دەدى ۇلتتىق بانك باسشىسى.

سونداي-اق تيمۋر مۇرات ۇلى بۇل ۇستانىمنىڭ دۇرىستىعىن ق ر پرەزيدەنتى دە ايتقانىن اتاپ ءوتتى.

— مەملەكەت باسشىسى ءوز سۇحباتىندا («انا ءتىلى» گازەتىنە بەرگەن - رەد.) قازاقستاننىڭ اشىق ءارى نارىقتىق ەكونوميكاسى ءۇشىن تەڭگەنىڭ ەركىن اعىمدا بولۋى تەپە-تەڭدىكتى ساقتاۋدىڭ جالعىز جولى ەكەنىن ناقتى اتاپ كورسەتتى، - دەدى ول.

ايتا كەتەيىك، بۇگىن ۇلتتىق بانك بازالىق مولشەرلەمەگە قاتىستى مالىمدەمە جاسادى.

تيمۋر سۇلەيمەنوۆ نە سەبەپتى بازالىق مولشەرلەمەنى %15,25 دەڭگەيىندە ساقتاۋ تۋرالى شەشىم قابىلدانعانىن ءتۇسىندىردى.

سوڭعى جاڭالىقتار